तेक्वान्दोको दुई हस्ती भण्डारी र श्रेष्ठ सम्मानित

चौतारा । सिन्धुपाल्चोकको लिसंखुपाखर गाउँपालिकाले तेक्वान्दो खेलाडी एवम् प्रशिक्षक प्रेम भण्डारी र १३औं दक्षिण एसियाली खेलकुद (साग) कि गोल्ड मेडलिस्ट एवम् अन्तर्राष्ट्रिय तेक्वान्दो रेफ्री काजल श्रेष्ठलाई सम्मान गरेको छ ।

पालिकास्तरीय राष्ट्रपति रनिङ शिल्ड प्रतियोगिताको अवसरमा भण्डारीलाई ३० हजार रुपैंया राशीसहित सम्मान गरेको हो । राष्ट्रिय तथा अन्तर्राष्ट्रिय तेक्वान्दो प्रतियोगितामा स्वर्ण पदक लगाएत विभिन्न पदक हासिल गरी देशको नाम उँचो बनाएवापत भण्डारीलाई कदरस्वरुप सम्मान गरिएको पालिका अध्यक्ष राजु लामाले बताए ।

‘२०४७ साल देखि तेक्वान्दो खेलसँग आबद्धु रहि राष्ट्रिय तथा अन्तर्राष्ट्रिय तेक्वान्दो प्रतियोगितामा स्वर्ण पदक लगाएत विभिन्न पदक हासिल गर्नुका साथै पछिलो समय सिन्धुपाल्चोक र काठमाण्डौं स्थित गोठाटार तेक्वान्दो डोजाङको समेत स्थापनामा महत्वपूर्ण भूमिका निर्वाह गरि कुशल प्रशिक्षकको रुपमा सयौं खेलाडीहरु उत्पादनमा उच्च योगदान पुर्याउँदै अन्तराष्ट्रिय जगतमा देशको पहिचान दिलाउन सफल हुनु भएकोमा उच्च प्रशंसा गर्दै हामीले सम्मान गरेका हौं’, लामाले भने ।

भण्डारीलाई नेपाली कम्युनिष्ट पार्टीका केन्द्रिय सदस्य माधव सापकोटा, पालिका अध्यक्ष राजु लामा र उपाध्यक्ष मिठु लामाले नगदसहित सम्मानपत्र प्रदान गरेका थिए । सम्मान ग्रहणपछि प्रतिक्रिया दिँदै भण्डारीले प्राप्त सम्मान सिंगो खेलक्षेत्रको सम्मान भएको बताए । ‘योग्यता र क्षमताको साथै सिंगो खेलक्षेत्रको सम्मानको रुपमा मैले ग्रहण गरेको छु’, भण्डारीले भने– ‘यो हौसला र प्रेरणाको लागि सिंगो पालिका टीमलाई आभार व्यक्त गर्दछु ।’

तेक्वान्दो खेलमार्फत राष्ट्रिय तथा अन्तर्राष्ट्रिय स्तरमा महत्वपूर्ण योगदान पुर्याउँदै आएका प्रशिक्षक प्रेम बहादुर भण्डारी यस अघि पनि विभिन्न सम्मानबाट विभूषित भएका छन् । भण्डारीले करिब तीन दशकभन्दा बढी समयदेखि तेक्वान्दो क्षेत्रमा सक्रिय रही २ हजार भन्दा बढी प्रशिक्षार्थीलाई प्रशिक्षण दिइसकेका छन् । तीमध्ये धेरै खेलाडीले राष्ट्रिय तथा अन्तर्राष्ट्रिय स्तरमा पदक जित्न सफल भएका छन् ।

सोही अवसरमा १३औं दक्षिण एसियाली खेलकुद (साग) कि गोल्ड मेडलिस्ट एवम् अन्तर्राष्ट्रिय तेक्वान्दो रेफ्री काजल श्रेष्ठलाई पनि पालिकाले नगद ३० हजारसहित सम्मान गरेको छ । सन् २०१४ मा ताइवानमा भएको दशौँ जुनियर वल्र्ड च्याम्पियनसिप खेलेकी काजलले २०१९ मा नेपालमै भएको १३औं सागमा ४६ केजी तौलमा स्वर्ण जितेकी थिइन् । यस्तै उनले अजरवैजानमा भएको वल्र्ड तेक्वान्दो च्याम्पियनसिप समेत खेलकी थिइन् ।

काजलले २०१५ मा मलेसियामा भएको सारावाक चिफ मिनिस्टर बोर्नेओ कप, २०१७ मा काठमाडौंमै भएको पहिलो वुमन्स अन्तर्राष्ट्रिय तेक्वान्दो च्याम्पियनसिप, २०१७ मै भएको भएको दोस्रो इन्डियन ओपन अन्तर्राष्ट्रिय तेक्वान्दो च्याम्पियनसिप, २०१८ मा काठमाडौंमा भएको काठमाडौं ग्योरोगी इन्टरनेसनल तेक्वान्दो च्याम्पियनसिप, २०२१ मा भएको नेपाल ओपन भर्चुअल इन्टरनेशनल तेक्वान्दो च्यामपियनसिपमा पनि स्वर्ण पदक जितेकी थिइन् ।

यस्तै उनले अन्य विभिन्न अन्तर्राष्ट्रिय प्रतियोगिताहरुमा रजत र कांस्य पनि जितेका छन् । उनले विभिन्न राष्ट्रिय प्रतियोगितामा स्वर्ण, रजत र कास्य पदक जितेकी छन् भने विभिन्न प्रतियोगितामा उत्कृष्ट महिला खेलाडीको अवार्ड समेत जितेकी छन् ।