रसुवा बाढीपछि सिन्धुपाल्चोकका २ सय २४ जना सम्पर्कविहीन

चौतारा । रसुवामा आएको बाढीपछि सिन्धुपाल्चोकका २ सय २४ जना व्यक्तिसँग सम्पर्क हुन नसकेको विवरण सार्वजनिक भएको छ ।

जिल्ला प्रशासन कार्यालय सिन्धुपाल्चोकले विभिन्न माध्यमबाट प्राप्त सूचनाका आधारमा सम्पर्कविहीन व्यक्तिहरूको विवरण संकलन गरी सार्वजनिक गरेको हो । बाढी प्रभावित क्षेत्रमा रहेका उनीहरूको अवस्थाबारे जानकारी प्राप्त हुन नसकेपछि खोज तथा उद्धारका लागि सम्बन्धित प्रशासनलाई आग्रह गरिएको छ ।

सहायक प्रमुख जिल्ला अधिकारी कृष्णप्रसाद शर्मामा अनुसार कैलाशमान सरोवर जाने विदेशीका गाइड र भरिया, व्यापारी, गोसाईंकुण्ड गएका तीर्थयात्री, हाइड्रोपावरमा काम गर्ने जनशक्ति र रसुवा भन्सार कार्यालयआसपास व्यापारिक काम गर्ने नागरिक सम्पर्कमा छैनन् । कार्यालयका अनुसार सम्पर्कविहीन रहेका २ सय २४ जनाको खोजी तथा उद्धारका लागि रसुवा र नुवाकोटका जिल्ला प्रशासन कार्यालयसँग आवश्यक समन्वय गर्न आग्रह गरिएको छ ।

बाढी प्रभावित क्षेत्रमा उनीहरू रहेको हुन सक्ने भएकाले सम्बन्धित निकायमार्फत खोजी कार्य अघि बढाउन अनुरोध गरिएको हो । सार्वजनिक विवरणअनुसार सम्पर्कविहीन हुनेमा सिन्धुपाल्चोकको भोटेकोशी गाउँपालिकाका नागरिक सबैभन्दा बढी रहेको जिल्ला प्रशासन कार्यालयले जनाएको छ । भोटेकोशी गाउँपालिकाका ६५ जना नागरिक वेपत्ता छन् ।

त्यस्तै बाह्रबिसे नगरपालिकाका ५९, बलेफी गाउँपालिकाका २९, जुगलका १६, चौतारा साँगाचोकगढी नगरपालिकाका १४, मेलम्ची नगरपालिकाका १४, सुनकोशी गाउँपालिकाका १४, त्रिपूरासुन्दरी गाउँपालिकाका पाँच, हेलम्बु गाउँपालिकाका चार र लिसंखुपाखर गाउँपालिकाका तीन जना बेपत्ता छन् ।

रसुवा बाढीमा सिन्धुपाल्चोकको वेपत्ताहरुको नामावली