लिदी पहिरो प्रभावितले पाए अस्थायी आवास

बाँसखर्क । सिन्धुपाल्चोकको जुगल गाउँपालिका– २ लिदीमा एक वर्ष अघि गएको पहिरोबाट विस्थापित बनेकाहरुले अस्थायी आवास प्राप्त गरेका छन्

७८ लाख २८ हजार ७ सय ५३ रुपैंया लागतमा अस्थायी आवास निर्माण गरिएको हो । सो लागतमा ३१ वटा आवास भवन, ७ वटा शौचालय, १ वटा हेल्थ पोष्ट भवन, १ वटा क्यान्टिन र १ वटा स्नानगृह निर्माण गरिएको जुगल गाउँपालिका– २ का वडा अध्यक्ष प्रताप लामाले बताए । प्रति घर २ लाख ५२ हजार ५ सय ३९ रुपैंया लागतमा निर्माण गरिएको हो ।

आइतबार एक कार्यक्रमबीच लिदी पहिरो प्रभावित परिवारका लागि जुगल गाउँपालिका– १ बाँसखर्कमा निर्मित अस्थायी आवास प्रभावितलाई हस्तान्तरण गरिएको छ । नेपाली सेना २६ नं. बाहिनी अड्डाका बाहिनीपति सहायक रथी विष्णु राउतले जिल्ला विपद् व्यवस्थापन समिति र स्थानीय विपद् व्यवस्थापन समितिलाई संयुक्त रुपमा हस्तान्तरण गरेका हुन् ।

आवास नेपाली सेनाले निःशुल्क श्रमदानबाट निर्माण भएको हो । आवास निर्माणको लागि जुगल गाउँपालिका प्रकोप व्यवस्थापन कोषबाट ५८ लाख २ हजार ४९ रुपैंया र विभिन्न संघसंस्था एवम् व्यक्तिहरुबाट २० लाख २६ हजार ६ सय ८६ रुपैया बराबरको सहयोग प्राप्त भएको जुगल गाउँपालिकाको अध्यक्ष होमनारायण श्रेष्ठले बताए ।

आवास निर्माण गर्दा २९ लाख ६ हजार १ सय १२ रुपैंयाको २२ हजार ५ सय २५ किलो फलाम, ७ लाख ४३ हजार ८ सय उनन्असी रुपैंयाको ५८ वण्डल जस्तापाता, १ लाख ६८ हजार ३ सय ७१ रुपैंयाको २ सय ३० बोरो सिमेण्ट प्रयोग गरिएको छ । १ लाख ४८ हजार रुपैंयाको गिटी, १ लाख ८० हजार रुपैंयाको बालुवा, २५ हजार ५ सय रुपैंयाको ढुङ्गा, ९६ हजार ५ सय ४८ रुपैंयाको इन्धन र ८ लाख ३१ हजार ३ सय ८५ रुपैंयाको ढुवानी, टुल्स लगायतमा खर्च भएको स्थानीय विपद् व्यवस्थापन समिति अध्यक्ष समेत रहेका पालिका अध्यक्ष श्रेष्ठले बताए ।
त्यस्तै स्काभेटरमा ९० हजार रुपैंया, झ्याल ढोकामा ४९ हजार २ सय ६८, विद्युत तथा शौचालय सामग्रीमा १ लाख ५७ हजार ८ सय ७५, मजदूर ज्याला ३ लाख ५५ हजार ७ सय ५० र ४९ हजार ३ सय ६१ रुपैंया खर्च भएको समितिले जनाएको छ ।

आवास निर्माणको लागि क्रिकेट खेलाडी सन्दिप लामिछानेले १ लाख २३ हजार ४ सय ८८ रुपैंयाको ९ सय ८ किलो फलाम र ३ लाख ७१ हजार ६ सय १३ रुपैंयाको २५ वण्डल जस्तापाता सहयोग गरेका थिए । त्यस्तै सिएरआरसी÷केयर नेपालले २२ हजार ८ सय रुपैंयाको ३० बोरा सिमेन्ट, ७ लाख ६३ हजार ९ सय ६० रुपैंयाको ६७ वण्डल जस्तापाता, पर्यटन व्यवसायी मिलन तामाङ र माया गुरुङले ७ लाख ४ हजार ८ सय २८ रुपैंयाको ५५ वण्डल जस्तापाता, निर्मला सिलवालले ४० हजार रुपैंया बराबरको विद्युतीय सामग्री सहयोग गरेको श्रेष्ठले बताए ।

एक वर्ष पछि अस्थायी भए पनि आवास पाएकोमा पहिरो प्रभावितहरु खुसी भएका छन् । ‘एक वर्षसम्म पालमा बस्दा हामीलाई निक्कै सकस भएको थियो । सुत्केरी, बालबालिका, बृद्धबृद्धालाई समस्या थियो’, पहिरो प्रभावित सावित्री तामाङले भनिन्– ‘अहिले हामीले अस्थायी आवास पाएका छौं, यसले हामीलाई केहि मात्रामा भएपनि खुसी दिएको छ ।’ अब बाँकी १ सय १८ घर परिवारलाई नै आवासको लागि स्थानीय सरकारले प्रयत्न गर्नुपर्नेमा उनले जोड दिईन् ।

स्थानीय सरकारले पहिरो प्रभावित सबैलाई आवासको लागि प्रयत्न भईरहेको स्थानीय सरकारले जनाएको छ । ‘लिदीका २ सय ८ घरधुरीसहित २ सय ५७ विपद् प्रभावितहरुसँग लाभग्राही सम्झौता गरी स्थायी आवास निर्माण गर्ने प्रकृया सुरु भईसकेको छ’, जुगल गाउँपालिका– २ का वडा अध्यक्ष प्रताप लामाले भने ।

२०७७ साउन ३० गते गएको पहिरोमा २ सय ९ घरघुरी प्रभावित बनेको थियो । पहिरोमा ३९ जनाको मृत्यु भएको थियो भने ३४ घरमा क्षति पुगेको थियो । जसमध्ये २९ घर पूर्ण क्षति भएको थियो ।