पूर्वसांसद् कर्मचार्यले छाडे एमाले (कस्ले के भने ?)

चौतारा । नेकपा एमाले सिन्धुपाल्चोकका पुरानो नेता एवम् पूर्व सांसद् सुभाष कर्मचार्यद्वारा ओली नेतृत्वको नेकपा एमाले परित्याग गरेको घोषणा गरेका छन् ।

आईतबार मध्यान्न कर्मचार्यले सामाजिक सञ्जाल मार्फत पार्टी परित्याग गरेको जनाएका हुन् । ‘नेपाल कम्युनिष्ट पार्टी एमाले सँगको ४० वर्ष भन्दा लामो राजनीतिक यात्रा समाप्त भएको घोषणा गर्दछु’, उनले सामाजिक सञ्जालमा लेखेका छन् ।

उनले एमाले परित्याग गरेको घोषणा गरेपछि एमाले भित्र ठूलै खैलाबैला मच्चिएको छ । उनको यो कार्यबारे सामाजिक सञ्जालाम मिश्रित प्रतिक्रिया आएका छन् । विष्णु थापा लेख्छन्, ‘आजैको दिनदेखि सिन्धुपाल्चोक नेकपा एमालेले ठूलो मुक्ति पाएको घोषणा गर्दछु ।’

त्यस्तै चौतारा साँगाचोकगढी नगरपालिकाको उपप्रमुख जानुका पराजुलीले आगामी राजनीतिक यात्रा सुखद् र सफल रहोस् भन्दै शुभकामना दिएकी छिन् । नेत्र थापाले पदमात्रै सब थोक नभई जनता साथमा रहेको बताएका छन् ।

गणेश गुरागाईं लेख्नछन्– ‘गलत निर्णय लिनुभयो कमरेड, एक जाडोले मात्र माघ जादैन । तपाईं यो पटक मात्र हैन यो भन्दा अगाडि नवौ महाधिवेशन मा नै केन्द्रीय सदस्य भईसक्नु पर्ने थियो तर दुर्भाग्य यो पटक पनि हुनुभएन यसले जिल्लाका सवै कार्यकर्ता दुखित छन तर तपाईं जस्तो लामो ईतिहास भएको नेताले तत्कालिन नाफा घाटा मात्र हेर्नू हुदैन थियो। समय सधै एकनास रहदैन, आज अध्यारो छ भने भोलि फेरि घाम लाग्छ भन्ने बुझ्नुपर्ने थियो । यद्यपी निर्णय नै लिईसकेपछि पार्टीमा आजसम्म गर्नुभएको योगदान तथा हामी कार्यकर्ताहरुमा भर्नु भएको राजनीतिक चेतको लागि हार्दिक धन्यवाद ज्ञापन गर्न चाहान्छु ।’

यता डिबी थापाले नेकपा एकीकृत समाजवादी पार्टीमा स्वागत भनेका छन् । सृजल भण्डारी लेख्छन्– ‘सिंगो नेकपा एमाले र सिन्धुपाल्चोक नेकपा एमालेलाई ठूलो हानी हुनेछ यसमा दुई मत छैन सुबास कमरेड । धेरै नै सोच बिचार र गहन अध्यन पश्चात् पार्टी अलग्गिनु भएको होला यसमा हजुरलाइ पनि उत्तिकै सहज होला भन्न सकिन्न । तथापि हजुरको आगामी राजनैतिक भबिस्यको उज्जवल कामना सहित अबको यात्रा सदैब सुरक्षित बनोस् ।’