१ सय ११ दिनदेखि विद्यार्थीको मत प्रहरी कार्यालयमा

चौतारा । सिन्धुपाल्चोकको चौतारा बहुमुखी क्याम्पसमा गएको चैत ५ गते भएको स्ववियु निर्वाचनको मत १ सय ११ दिनसम्म पनि गणना हुन सकेको छैन ।

विद्यार्थीहरुले हालेको मत जिल्ला प्रहरी कार्यालयमा थन्किएर बसेको छ । मतदान प्रकृयामा गैरविद्यार्थीले मतदान गर्न खोजेको भन्दै विवाद भएपछि क्याम्सप प्रशासनले चैत्र ५ गते साँझ मतपेटीका शिलबन्दी गरी जिल्ला प्रहरी कार्यालयमा बुझाएको थियो । ‘हामीलाई बुझाएको मतपेटीका अहिलेसम्म सुरक्षित राखेका छौं’, जिल्ला प्रहरी कार्यालय भन्छ– ‘यो पतपेटीका के गर्ने क्याम्पसले हामीलाई केही भनेको छैन ।’

मतदान भएको १ सय ११ दिन बित्दासमेत क्याम्पस प्रशासनले ठोस निर्णय लिन नसक्दा विद्यार्थीहरुको मत अनिर्णयको बन्दी बन्न पुगेको विद्यार्थीहरुले बताएका छन् । चौतारा क्याम्पसका पूर्व स्ववियु सभापति एवम् क्रान्तिकारी विद्यार्थीका नेता मिलन लामाले क्याम्पस सञ्चालक समितिको गैरजिम्मेवारीका कारण चौतारा क्याम्पसको मत गणनामा समस्या भएको बताउँछन् । ‘विद्यार्थीले आफ्नो प्रतिनिधि छनौटका लागि मत दिइएको १ सय ११ दिन भइसक्यो, मतेपेटीका प्रहरी कार्यालयमा छ, क्याम्पस प्रशासनले कुनै चासो गर्दैन’, लामाले भने । आफूहरू नयाँ मतदान गर्न, रोकिएको अवस्थाबाट बाँकी मतदान गर्न वा अहिले भएको मतपेटीकाको मत गणना गर्न समेत तयार भए पनि क्याम्पस प्रशासनले कुनै चासो नदिएको लामाको भनाई छ ।

निर्वाचन प्रक्रिया स्थगित भएपछि त्यसको केही समय पछि सिन्धुपाल्चोकका प्रमुख जिल्ला अधिकारी किरण थापाले सबै पक्षलाई राखेर छलफल गराउन खोजेका थिए । तर थापालाई नेपाली कांग्रेसका केन्द्रीय सदस्य मोहनबहादुर बस्नेतले धम्कीपूर्ण चेतावनी दिएपछि प्रमुख जिल्ला अधिकारी थापाले छलफललाई अगाढी नबढाएको विद्यार्थीहरुको भनाई छ ।

निर्वाचन प्रकृयाको बेला तनाव सिर्जना गर्न मूख्य रुपमा क्याम्पस प्रशासन, निर्वाचन समिति जिम्मेवार भएको क्रान्तिकारीबाट स्ववियु सभापतिका उम्मेद्वार भएका अमृत श्रेष्ठ बताउँछन् । ‘अहिलेसम्म न त क्याम्पस प्रशासनको बैठक बस्न सकेको छ, न त निर्वाचन समितिले स्ववियु निर्वाचन प्रकृयाबारे केही जानकारी गराएको छ’, उनले भने– ‘राजनैतिक स्वार्थको आधारमा २ सय ६९ विद्यार्थीको मतलाई थुनेर राख्नु विद्यार्थीको अधिकारलाई कुठाराघात गर्नु हो ।’ अब पनि मतको बारे क्याम्पस प्रशासनले विद्यार्थीलाई स्पष्ट जानकारी नदिए विद्यार्थीहरु चुप लागेर नबस्ने उनले सुनाए ।

चौतारा क्याम्पस प्रमुख नगेन्द्रप्रसाद दंगाल भने यो आफूहरूको भन्दा राजनीतिक सवाल भएकाले राजनीतिक दलहरूबीच छलफल गरेर पछि मात्रै आफूहरूले निकासा दिन सक्ने पक्षमा रहेको बताए । ‘क्याम्पस सञ्चालक समितिको बैठक पछि मात्रै के गर्ने भन्ने निर्णय होला’, दंगालले भने । तर क्याम्पस सञ्चालन समितिको बैठक चैत्र ५ यता बस्न सकेको छैन ।

सत्ता गठबन्धनका कांग्रेस र एमालेका विद्यार्थी संगठनको प्यानल र माओवादी निकट अनेरास्ववियु क्रान्तिकारी र समाजवादी विद्यार्थीको गठबन्धन चुनावी प्रतिस्पर्धामा उत्रिएको थियो । शान्तिपूर्वक निर्वाचन हुँदै गर्दा क्रान्तिकारीले नक्कली विद्यार्थीलाई लगेर मतदानमा सहभागी गराउन खोजेको भन्दै सत्ता गठबन्धनका कार्यकर्ता तथा विद्यार्थीहरूले विवाद उत्पन्न गरेका थिए ।

सत्ता गठबन्धनका विद्यार्थी संगठनबाट सभापतिका प्रत्याशी सुशील लोप्चन, सचिवका उम्मेद्वार चीनलाल तामाङ र समानुपातिकबाट सदस्यको उम्मेदवार एवम् पत्रकार महासंघ सिन्धुपाल्चोकको कार्यसमिति सदस्य प्रमीला विकले मतपेटीकामा लात्तीले हानेपछि अवस्था तनावग्रस्त भएको थियो । जसका कारण तत्काल मतदान प्रक्रिया स्थगित भयो भने नक्कली मतदाता र मतपेटिकामा लात्तीले हान्ने विद्यार्थीहरूलाई प्रहरीले नियन्त्रणमा लिएको थियो । राजनैतिक दलका नेताहरूबीच सहमति भएपछि नक्कली मतदाता र मतपेटीकामा लात्ती प्रहार गर्ने उम्मेद्वारहरुलाई सोही दिन अबेर प्रहरीले छाडेको थियो ।

सत्ता गठबन्धनबाट सभापतिका उम्मेद्वार भएका एमाले निकट अनेरास्ववियुका सुशील लोप्चन लगायत प्यानले नै हार्ने देखेपछि पूर्वसासंद एवम् एमाले केन्द्रीय सदस्य सुवास कर्माचार्यले विद्यार्थी नेताहरूलाई मतपेटीकामा लात्ती हानेर फालिदिन निर्देशन दिएको विद्यार्थीहरुकै आरोप छ । ‘सत्ता गठबन्धनकै पूर्व सांसद्, नेता एवम् जनप्रतिनिधिहरुले चुनावलाई भाँड्ने काम गरेको हामीले प्रत्यक्ष देखेका छौं’, विद्यार्थी  एवम् अखिल (क्रान्तिकारी) चाैतारा नगरका फ्याक्सन इञ्चार्ज सुवास गौतम भन्छन्– ‘७३ प्रतिशत विद्यार्थीले मतदान गरिसकेको स्ववियु निर्वाचन १ सय ११ दिन वितिसक्दा पनि अनिर्णित हुनु गम्भीर विषय हो ।’ उनले तत्काल क्याक्पस प्रशासनले निर्वाचनका बाँकी प्रकृया सुरु नगरे गैर जिम्मेवार क्याक्पस प्रशासन, निरिह सञ्चालक समिति र दलको पछि लाग्ने निर्वाचन समिति बिरुद्ध कडा प्रतिवादमा उत्रने चेतावनी दिए ।

विद्यार्थी संगठनहरुबीच निर्वाचन भए पनि चौतारा क्याम्पसको स्ववियु निर्वाचन भने प्रमुख तिन राजनीतिक दल नेपाली कांग्रेस, नेकपा एमाले र माओवादीबीच प्रतिष्ठाको लडाई नै भएकाले पनि तत्कालै सहमति हुने सम्भावना देखिएको छैन । चौतारा क्याम्पसमा माओवादी आफ्नो विरासत जोगाउन चाहन्छ भने एमाले र कांग्रेस माओवादीको विरासत भत्काउन खोजिरहेका छ । त्यही भएर सिन्धुपाल्चोकको स्ववियु निर्वाचनमा कांग्रेस र एमालेका विद्यार्थी संगठनबीच गठबन्धन भएको थियो ।