चौतारा नगरमा नयाँ नाटक मञ्चनः कार्यालय समय अघिनै निकाल्यो नतिजा

चौतारा । सरकारी कार्यालय कतिबजे खुल्छ ? सबैलाई जानकारीकै विषय हो बिहान १०ः०० बजे । तर सिन्धुपाल्चोकको चौतारा साँगाचोकगढी नगरपालिका कार्यालय समय अघिनै खुल्ने गर्छ !

त्यसो त कहिले काँहि १०ः३० सम्म नखुल्ने गरेको नगरपालिकाले आफ्नो फेसबुक पेजमा बुधबार बिहान ९ः४८ मा रोजगार सहायक नतिजा प्रकाशन गरेको छ । यसरी हेर्दा कार्यालय त्यो अघिनै खुलेको हो भन्ने देखिन्छ । बुधबार बिहान ८ः२३ मा ग्लोबलपाटी डटकममा नगरपालिकाले माग गरेको रोजगार सहायक पदको एक सातासम्म नतिजा प्रकाशन गर्न नसकेको सम्बन्धी ‘आफ्नो’ छान्न नसक्दा चौताराले राख्न सकेन रोजगार सहायक’ शीर्षकको समाचार प्रकाशन भएलगत्तै हतार हतार कार्यालय समय अघिनै नतिजा प्रकाशन गरेको हो ।

सरकारले २०७९ असार १ गतेदेखि लागू हुने गरी नयाँ कार्यालय समय निर्धारण गरेको थियो । जस अनुसार नेपाल राज्यभरका सबै सरकारी कार्यालयहरूमा आइतबारदेखि बिहीबारसम्म २०७९ असार १ गतेदेखि कात्तिक १५ गतेसम्म तथा माघ १६ गतेदेखि चैत मसान्तसम्म कार्यालय समय बिहान १०ः०० देखि अपराह्न ५ः०० बजेसम्म हुने भनिएको छ । यस्तै कात्तिक १६ गतेदेखि माघ १५ गतेसम्म बिहान १०ः०० बजेदेखि अपराह्न ४ः०० बजेसम्म र शुक्रबारको दिन कार्यालय समय बिहान १०ः०० बजेदेखि अपराह्न ३ः०० बजेसम्म हुने भनिएको छ ।

आफ्नो भरपर्दो स्रोत र पदपूर्ति सिफारिस समितिका अध्यक्षसहितको भनाई उल्लेख गर्दै समाचार प्रकाशन भएपछि नगरपालिकाले ‘लापर्बाही’ तरिकाले नतिजा प्रकाशन गरेको हो । नतिजा प्रकाशन गर्दा रोजगार सहायक पदपूर्ति सम्बन्धी मापदण्ड २०७८ लाई पालना गरेको समेत देखिदैन । मापदण्डको दफा ८(५) मा ‘अन्तिम योग्यताक्रमको सूचिबाट सबैभन्दा बढी अंक प्राप्त गर्ने उम्मेद्वार छनौट गरिसकेपछि बाँकी रहेका सबै उम्मेद्वारहरु बैकल्पिक सूचीमा रहनेछन्’ भनिएको छ ।

नगरपालिकाले मापदण्डको खिलाफमा रही बैकल्पिक उम्मेद्वारको सूची समेत प्रकाशित नगरी नतिजा प्रकाशन गरेको छ । नगरपालिकाले मनोमानी ढंगले नतिजा प्रकाशन गरेपछि अन्य उम्मेद्वार रुष्ट भएका छन् । ‘यस्तो लापर्वाही नतिजा प्रकाशन हामीलाई मान्य छैन । हामीले कानुनी उपचारनै खोज्नुपर्ने देखियो’, एक उम्मेद्वारले भने– ‘वैकल्पिकको सूची पनि राखिएन, सिधै जागिर खुवाउने भए किन आवेदन माग गरेको, किन परीक्षा लिएको ।’ नगरप्रमुख कृष्णप्रसाद सापकोटाकै गाउँको मान्छे राख्न यत्रो नाटक मन्चन किन गरेको भन्दै उनी रुष्ट भए ।

त्यसो त रोजगार सहायक पदपूर्ति सम्बन्धी मापदण्ड २०७८ मा ‘प्रकाशन भएको नतिजा स्थानीय तहले आफ्नो कार्यालयको सूचना पाटीमा र वेवसाईटमा टाँस गर्नुपर्ने’ उल्लेख छ । तर चौतारा साँगाचोकगढी नगरपालिकाले समाचार तयार गर्दासम्म (बुधबार बिहान ११ः३० बजे) न त सूचना पाटीमानै टाँस गरेको छ, न वेवसाईटमा नै राखेको छ ।
‘सबै कुरा केलाउँदा नजिता प्रकाशन नगरपालिकाको कार्यालयबाट नभई घरैबाट गरेको देखिन्छ’, स्रोतले भन्यो– ‘फेसबुक पेजमा ९ः४८ मा सूचना प्रकाशन गर्न सक्नेले आफ्नो सूचना पाटी र वेवसाईटमा किन राख्न सकेनन् ?’

स्रोतका अनुसार पदपूर्ति समितिले परीक्षा दिएकै साँझ नतिजा नगरपालिकालाई बुझाएको थियो । नेकपा (माओवादी केन्द्र) का नेताहरुले आ–आफ्नो ‘पकेट’ का उम्मेद्वारको नाम निकाल्न दवाव दिएका कारण नगरले एक सातासम्म नतिजा प्रकाशन गर्न सकेको थिएन । साउन ३१ गते नतिजा प्रकाशन गर्ने अन्तिम सहमति भएपनि ‘कस्लाई राख्ने’ भन्ने विवादका कारण नतिजा प्रकाशन हुन सकेन । तर बुधबार बिहान समाचार प्रकाशन भएलगत्तै हतार हतारमा कार्यालय समय अगाडिनै फेसबुक मार्फत नतिजा प्रकाशन गरियो ।

‘यो सापकोटा परिवारको जीत हो, चौतर्फी दवावका कारण आफन्त राख्न नसकिएपछि आफूले भनेको मान्ने र आफ्नै गाउँकाको नाम निकाले’, स्रोत भन्छ– ‘दाल कहाँ पोखियो घीउमा भनेझैं देखिन्छ ।’ शक्ति प्रदर्शनको यो खेलमा एउटा शक्तिले मात्रै जितेपछि ‘आफ्नो मान्छे’ राख्न दवाव दिईरहेका माओवादी अन्य नेतासमेत रुष्ट भएका छन् ।

गैरजिम्मेवारी तरिकाले नतिजा प्रकाशन गरेपछि उम्मेद्वारी दिएका नेकपा (माओवादी केन्द्र) संबद्ध भातृसंगठनका नेता कार्यकता चिढिएका छन् । ‘एउटा जागिरको लागि यसरी हामीमाथि राजनीति गरियो । यसले राम्रो गर्दैन’, एक उम्मेद्वारले भने– ‘चुनाव आउनै लागेको छ, यसरी परिवारवाद र आफ्नो ‘पकेट’ संरक्षण गर्न खोज्दा खल्तिको झर्ने निस्चित छ । जनप्रतिनिधि भएर काईते राजनीति गर्नुभन्दा पद त्यागेर खुल्ला राजनीतिमा आउन म नगरप्रमुखलाई चुनौति दिन्छु ।’ उनको भनाइलार्ई आधार मान्ने हो भने सानो राजनीतिक खेलले आगामी चुनावमा नेकपा (माओवादी केन्द्र) लाई ठूलै घाटा बेहोर्नुपर्ने छ ।

हेर्नुस् रोजगार सहायक पदपूर्ति सम्बन्धी मापदण्ड २०७८ विपरित नगरले बुधबार बिहान ९ः४८ निकालेको नतिजाः