‘आफ्नो’ छान्न नसक्दा चौताराले राख्न सकेन रोजगार सहायक

चौतारा । चौतारा साँगाचोकगढी नगरपालिकाले माग गरेको रोजगार सहायक पदमा ‘आफ्नो’ मान्छे छान्न नसक्दा परीक्षा भएको एक साता बित्दा समेत नतिजा प्रकाशन गर्न सकेको छैन ।

नगरपालिकाले गएको असार २८ गते रोजगार सहायक पदमा आवेदन माग गरेको थियो । १५ दिनको समयसीमा भित्र प्राप्त २३ जनाको आवेदनमध्येबाट साउन १८ गते परीक्षामा संलग्न हुनको लागि १० जनाको प्ररम्भीक सूची प्रकाशन गरेको थियो । प्रारम्भीक सूची प्रकाशन गरेको एक साता पछि साउन २५ गते उम्मेदवारहरुको परीक्षा लिएको थियो ।

प्रारम्भीक सूचीमा नाम समेटिएको १० जना मध्ये पनि १ जनाले परीक्षा नै दिएनन् । परीक्षा भनिएपनि जागिर खुवाउने मान्छे पहिल्यै तय भईसकेका कारण ती व्यक्तिले परीक्षा नदिएको स्रोतको भनाई छ । प्रारम्भीक सूचीमा नाम निक्लिई परीक्षा दिएका ९ जना मध्ये सबै नेकपा (माओवादी केन्द्र) निकटका नेता कार्यकर्ता छन् । सोहि कारण र उच्च तहका नेताले ‘आफ्नो मान्छे’ राख्नै पर्ने दवावका कारण नगरपालिकाले नतिजा प्रकाशन गर्न नसकेको स्रोतको दाबी छ ।

नगरपालिकामा सो पार्टीबाट उम्मेद्वारी दिई जीत हासिल गरेका कृष्णप्रसाद सापकोटा नगर प्रमुख छन् । उनी नेकपा (माओवादी केन्द्र) का पोलिट्ब्युरो सदस्यसमेत हुन् । माओवादीका नेताहरुले आ–आफ्नो ‘पकेट’ का उम्मेद्वारको नाम निकाल्न दवाव दिएका कारण नगरले नतिजा प्रकाशन गर्न नसकेको देखिन्छ । ‘आफ्नै पार्टीको नेताहरुको ‘आफ्नो मान्छे’ राख्नु पर्ने ‘प्रेसर’ का कारण नगर प्रमुखले नतिजा निकाल्न नसकेका हुन्’, स्रोतले भन्यो ।

पदपूर्ति सिफारिस समितिका अध्यक्ष एवम् नगरपालिकाको प्रमुख प्रशासकीय अधिकृत रामबहादुर केसीले समितिका सदस्यहरु नआईपुगेकोले नतिजा प्रकाशन गर्न नसकेको बताए । समितिमा नगरले तोकेको विषय विज्ञ र प्रशासन शाखा प्रमुख सदस्य छन् । केसीले सदस्यहरु नभएको कारण नतिजा प्रकाशन गर्न नसकेको जबाफ दिएपनि उनीहरु यतै रहेको स्रोतको भनाई छ । ‘दुबै सदस्य आईतबारदेखि चौतारामै देखिरहेका छन्, कार्यक्रमहरुमा जान सक्ने, प्रशासन शाखामा काम गरिरहेको भेटिने तर नतिजा प्रकाशनमा चाहिँ उपलब्ध नभएको भन्ने ?,’ स्रोतले भन्यो– ‘सिफारिस समितिका अध्यक्षले ढाँटेको कारण पनि ‘दालमा कुछ काला हे’ भन्ने देखिन्छ ।’

नगरपालिकाले एक सातासम्म नतिजा ननिकालेपछि परीक्षामा संलग्नहरु रुष्ट भएका छन् । ‘आफ्नो मान्छे राख्ने भए किन परीक्षा लिनु, परीक्षा लिएपछि एक सातासम्म किन नतिजा निकाल्न नसकेको ?’, एक परीक्षार्थीले भने– ‘अब पनि नतिजा ननिकाले यस्तो गैरजिम्मेवारी काम बिरुद्ध हामी कानुनी प्रकृयामा जान्छौं ।’

परीक्षामा संलग्न ९ जना मध्ये एकजना नगर प्रमुखको आफन्त र अरु नेकपा (माओवादी केन्द्र) का भातृसंगठनहरुका नेता कार्यकता छन् । नगरप्रमुख सापकोटाको इच्छा आफ्नै आफन्तलाई राख्ने देखिन्छ । त्यस्तै माओवादीका नेताहरुले आ–आफ्नै ‘पकेट’ का व्यक्तिहरुको नाम निकाल्न दवाव दिईरहेका छन् । स्रोतका अनुसार ती नेताहरुमध्ये केहिले परीक्षाको भोलीपल्ट साउन २६ गते नगर प्रमुख सापकोटालाई भेट गरी ‘आफ्नो मान्छे’ को नतिजा निकाल्न दबाब दिएका थिए ।

चौतारा साँगाचोकगढी नगरपालिकाको परीक्षा भएको अघिल्लो दिन साउन २४ गते सोहि पदको लागि परीक्षा गरेको जुगल गाउँपालिकाले परीक्षा सकेको २ घण्टा भित्रै नतिजा निकालेको थियो । ‘हाम्रोमा एकदमै स्वच्छ तरिकाले परीक्षा लिई नतिजा निकाल्यौ’, गाउँपालिका प्रमुख रेशम स्याङ्बोले भने– ‘आफ्नो मान्छेलाई जागिर खुवाउने भन्दा पनि योग्यलाई नियुक्त गर्नेमा हामीले जोड दियौं ।’

जिल्लाका अन्य स्थानीय तहले पनि परीक्षा लगत्तै नतिजा सार्बजनिक गरेका छन् । कुनै पालिकामा भर्खर प्रारम्भीक सूची प्रकाशन गरेका छन् । तर चौतारा साँगाचोकगढी नगरपालिकाले भने परीक्षा दिएको एक साता बितिसक्दा पनि नतिजा सार्बजनिक गर्न नसक्नु राजनीतिक चक्रव्यूको पराकाष्ठा भएको बुद्धिजीविहरुको भनाई छ । ‘एउटा कर्मचारी पदपूर्ति गर्न त यस्तो राजनीति हुन्छ भने नागरिकको काम छिटो, छरितो र पारदर्शी रुपमा कसरी होला ? नगरप्रमुखकै कार्यशैलीमाथी प्रश्न खडा भएको छ,’ उनीहरुको भनाई छ ।