ओली पक्षले लगाएको ताल्चा तोड्दै नेपाल समूहले राख्यो साईनबोर्ड

चौतारा । नेकपा एमाले सिन्धुपाल्चोकमा ओली पक्ष र नेपालपक्षबीच लफडा सुरु भएको छ । पार्टी कार्यालय चौतारामा ओली पक्षले लगाएको ताल्चा तोड्दै नेपाल समूहले साईनबोर्ड राखेपछि दुईपक्षबीचको विवाद चुलिएको हो ।

आइतबार नेकपा एमालेको बागमती सचिवालय सदस्य एवम् पूर्व सांसद् सुभाष कर्मचार्यको नेतृत्वमा पुगेको टोलीले ओली पक्षले पार्टी कार्यालयको मूख्य ढोकामा लगाएको ताला तोडी साईनबोर्ड राखेको छ । सर्वोच्च अदालतले एमाले ब्यूँताइदिए लगत्तै गएको फागुन २५ गते ओली पक्षका जिल्ला अध्यक्ष बालकृष्ण देउजाको टोलीले पार्टी कार्यालयको ताला तोड्दै नेकपाको बोर्ड फेरि नेकपा एमालेको बोर्ड राखेको थियो ।

आफ्नो कार्यालयमा अरुलेनै ताल्चा लगाएको भन्दै आफूहरुले पार्टीको कार्यक्रम सूचारु गर्नको लागि कार्यालय सञ्चालनमा ल्याउन ताल्चा तोडीएको नेपाल पक्षका जिल्ला अध्यक्ष झम्क नेपालले बताए । ‘सिन्धु एमालेको हामी संस्थापन पक्ष हौं’, उनले भने– ‘हाम्रो कार्यालयमा ताल्चा लगाउने अधिकार कसैलाई छैन ।’ आफूहरुले चावी माग्दा नदिएपछि तोड्नुपरेको उनले बताए ।

बोर्ड स्थापनापछि संक्षिप्त कार्यक्रममा बोल्दै पूर्व सांसद् सुभाष कर्मचार्यले माओवादीबाट भागेका एकदुई भगौडा केटाहरुलाई साथमा लिएर कम्युनिष्ट आन्दोलन पूरा नहुने भन्दै ओली पक्षका जिल्ला अध्यक्ष बालकृष्ण देउजालाई भने– ‘बालकृष्ण जी तपाईं माओवादी युद्ध सुरु भएपछि जिल्ला कमिटिबाट राजिनामा दिएको मान्छे कुन मुखले झम्क नेपाललको बराबरी हुँ भन्नु हुन्छ ?’ जुगल गाउँपालिकाको अध्यक्ष होमनारायण श्रेष्ठलाई ईंकित गर्दै उनले झम्क नेपाल अध्यक्षमा निर्वाचित हुँदा लज्जास्पद मत ल्याएर हार्नेहरुले फुर्ति नलगाउन चुनौति दिए ।

‘कोहि चुनावदेखि डराएर भाग्ने, कोहि लज्जास्पद मत ल्याएर हार्नेहरु अहिले चुरिफुरी गरिरहेका छन्’, कर्मचार्यले भने– ‘अहिले उहाँहरु भन्नुहुन्छ, जिल्ला अध्यक्ष त म पो हो । यो कस्तो पद्दती हो, यो कस्तो स्कूलिङ हो ?’ ओली पक्ष पार्टी कार्यालय, जनवर्गीय संगठन सबै कब्जा गर्ने रणनीतिमा उत्रिएको भन्दै त्यसको बिरुद्धमा प्रतिकार गर्न युवा वर्गलाई आह्वान गरे ।

ओलीले कम्युनिष्ट आन्दोलाई बबार्दीतर्फ लैजाने काम गरेको भन्दै कम्युनिष्ट पार्टीको अध्यक्षको नाममा कलंक रहेको उनले बताए । ‘हामीले भन्यौं पार्टी विधि पद्दतीमा चलाऔं, तर उहाँहरुले मान्नु भएन । हामीलाई पार्टीबाट कार्बाहि गर्नेसम्मको तहमा पुग्नुभयो’, उनले भने– ‘तर हामी हाम्रो पार्टीलाई बिग्रन दिँदैनौं ।’

कार्यक्रममा बागमती प्रदेको सांसद इन्द्रमाया युरुङ, मेलम्ची नगरपालिकाका प्रमुख डम्बर अर्याल, बागमती प्रदेशका सदस्य सोम सापकोटा, नेता बालचन्द्र मिश्र, जिल्ला समन्वय समितिका प्रमुख कृष्णगोपाल तामाङ, विभिन्न स्थानीय तहका प्रमुख, जिल्ला नेता एवम् कार्यकर्ताहरुको सहभागिता थियो ।