नाटकघरसहितको सिन्धु कला मन्दिरको सामुदायिक भवन बन्ने

चौतारा । सिन्धुपाल्चोकको सदरमुकाम चौतारामा नाटकघर, संग्राहलय, पुस्तकालय र सूचना केन्द्रसहितको सामुदायिक भवन बन्ने भएको छ ।

बागमती प्रदेश सरकारका भौतिक पूर्वाधार विकास मन्त्री युवराज दुलालले शनिबार भवनको शीलान्यास गरेका छन् । शीलान्यास गर्दै मन्त्री दुलालले कला, साहित्य र संस्कृतिको संरक्षण र प्रवर्धनमा प्रदेश सरकार योजनावद्ध ढंगले लाग्ने बताए । ‘सदरमुकाम चौतारा जिल्लाकै केन्द्र हो । सहरी अवधारणअनुरुप विकास गर्न सिन्धु कला मन्दिरको भवन पनि एउटा अंग हो,’ उनले भने, ‘भवन तयार भएपछि गीतसंगीत, कला र साहित्यका विभिन्न विधाको तालिम र प्रशिक्षण सञ्चालन गर्न सकिन्छ ।’

शिक्षा, स्वास्थ्य, रंगशाला, अरु भौतिक पूर्वाधारजस्तै सिन्धु कला मन्दिरको भवन पनि सहरी क्षेत्र निर्माणको लागि अपरिहार्य रहेको उनले प्रष्ट्याए । भवन बनाउन आवश्यक बजेट जुटाउन लागिपर्ने दुलालले बताए । सिन्धु कला मन्दिरले बिगत लामो समयदेखि सदरमुकाम चौतारामा गीतसंगीत, कला र साहित्यको क्षेत्रमा काम गर्दै आएको छ ।

भवन निर्माणको लागि करिव २ करोड अनुमानित लागत लाग्ने सिन्धु कला मन्दिरले जनाएको छ । ‘डिपिआर अनुसार भवन निर्माण गर्न २ करोड लाग्ने देखिएको छ’, मन्दिरका अध्यक्ष चन्द्रसिं घलेले भने– ‘यो नाटकघर, संग्राहलय, पुस्तकालय र सूचना केन्द्रसहितको सामुदायिक भवनको रुपमा रहने छ ।’

भवन निर्माणको लागि पहिलो चरणमा बागमती प्रदेश सरकार आर्थिक मामिला तथा योजना मन्त्रालयले २५ लाख रुपैंया बजेट विनियोजन गरिसकेको छ । सोहि बजेटबाट भवन निर्माणको सुरुवात गरिने अध्यक्ष घलेले बताए । भवन निर्माणको लागि सिन्धु कला मन्दिरले २ वर्ष अघि नै चौतारामा १४ आना जग्गा खरिद गरिसकेको थियो । भवन निर्माणमा बागमती प्रदेश सरकार र चौतारा साँगाचोकगढी नगरपालिकाले सहायता गर्ने बचनबद्धता दिएको छ । भवन निर्माणसँगै कला, साहित्य, संस्कृति र पर्यटन क्षेत्रको विकासमा थप टेवा पुग्ने छ ।

कार्यक्रममा ५ नं. वडाका कार्यवाहक अध्यक्ष रामबहादुर घलेले मन्त्री दुलालले सदरमुकाम र समग्र जिल्लाको विकासमा यसअघि खेलेको भूमिकाको प्रशंसा गर्दै राजनीतिक आस्था छोडेर कामको मूल्याङ्कन गर्दा दुलाल नै विकासको लागि स्थापित नेता बनेको बताए । वडासँग पर्याप्त बजेट नभएपनि भवन बनाउन क्रियाशील हुने उनको भनाइ थियो ।

कार्यक्रममा चौतारा साँगाचोकगढीकी उपप्रमुख सीता थापा, जनप्रतिनिधिहरु, विभिन्न राजनीतिक दलका प्रतिनिधि, बुद्धिजीवि, स्रष्टा–सर्जक, सञ्चारकर्मीहरुको उपस्थिति थियो ।