खुला दौडको उपाधि बिक, तामाङ र ढुङ्गेललाई

चौतारा । गणतन्त्र दिवस २०८२ को अवसरमा सिन्धुपाल्चोकको चौतारामा आयोजना भएको खुला दौड प्रतियोगिताको उपाधि सागर बिक, दुर्गाप्रसाद ढुङ्गेल र निमा तामाङले जितेका छन् ।

गणतन्त्र दिवस जिल्ला समारोह समितिको निर्णय अनुरुप जिल्ला खेलकुद विकास समितिले दिवसको अवसरमा आयोजना गरेको ५ किलोमिटर खुला पुरुषतर्फ इन्द्रध्वज गणका सागर बिकले निर्धारित दुरी १८ मिनेट १६ सेकेण्डमा पार गर्दै विजेता भएका हुन् । दौडमा सोही गणका अमृत बयलकोटीले १८ मिनेट ४४ सेकेण्ड र रामबहादुर सुनारीले १९ मिनेट ७ सेकेण्डमा दूरी पार गर्दै द्वितीय र तृतीय भए ।

३ किलोमिटर खुला महिलातर्फ चौतारा साँगाचोकगढी नगरपालिका– ७ की निमा तामाङ प्रथम भईन् । उनले निर्धारित दुरी १७ मिनेट ४९ सेकेण्डमा पार गर्दै विजेता भएका हुन् । दौडमा स्वीकृती श्रेष्ठले १९ मिनेट ४४ सेकेण्ड र सयुना श्रेष्ठले २० मिनेट ४७ सेकेण्डमा दूरी पार गर्दै द्वितीय र तृतीय हुन सफल भए । त्यस्तै ५ किलोमिटर ४० वर्षमाथीको पुरुषतर्फ चौतारा साँगाचोकगढी नगरपालिका– १३ का दुर्गाप्रसाद ढुङ्गेलले निर्धारित दुरी २३ मिनेट ३८ सेकेण्डमा पार गर्दै प्रथम भए । दौडमा शसस्त्र प्रहरी बलका राजु कोईरालाले २५ मिनेट ५२ सेकेण्ड र सोही बलका जगतबहादुर भुजेलले २६ मिनेट ३२ सेकेण्डमा दूरी पार गर्दै द्वितीय र तृतीय भएको जिल्ला खेलकुद विकास समिति सिन्धुपाल्चोकमा अध्यक्ष रामकृष्ण दंगालले जानकारी दिए ।

प्रतियोगिताका प्रथम, द्वितीय र तृतीय भएका खेलाडीलाई ट्रफी र प्रमाणपत्र प्रदान गरिने अध्यक्ष दंगालले बताए । विजेतालाई गणतन्त्र दिवसको दिन हुने अन्तिम कार्यक्रममा पुरस्कार प्रदान गरिने उनको भनाई छ । प्रमुख जिल्ला अधिकारी किरण थापाले रिवन काटेर दौड प्रतियोगिताको शुभारम्भ गरेका थिए ।