मापदण्डभित्र रहेर काम नगरेको टोलीको निष्कर्ष

मेलम्ची । मेलम्ची नगरपालिकाले नगर भित्रका विभिन्न क्रसर उद्योगहरुको अनुगमन गरेको छ । अनुगमनको क्रममा क्रसर उद्योगहरुले मापदण्ड भित्र रहेर काम नगरेको पाईएको टोलीले निष्कर्ष निकालेको छ ।

नदीजन्य पदार्थ उत्खनन्को अवस्था, मापदण्डको पालना, प्रारम्भीक वातावरण परीक्षण प्रतिवेदन लगायत मापदण्डमा रहेर काम गरे नगरेको विषयमा अनुगमन गरिएको नगरपालिकाले जनाएको छ । दिगो रुपमा नदीजन्य पदार्थको उत्खनन् लाई ध्यान दिँदै वातावरण संरक्षण गर्ने कार्यमा आवश्यक जानकारी गराउन अनुगमन गरिएको अनुगमन पछि तयार पारिएको प्रतिवेदनमा उल्लेख गरिएको छ ।

मापदण्ड विपरित गरिएका क्रियाकलापहरुको निषेध गर्न आवश्यक सहयोग गर्नु प्रमुख उदेश्य रहेको नगरपालिकाले प्रस्ट्याएको छ । अनुगमनको क्रममा वातावरणीय परीक्षण प्रतिवेदनमा उल्लेख भएको ब्यबस्थालाई पूर्ण रुपमा पालना नगरी नदीजन्य पदार्थ संकलन तथा उत्खनन् गरेको पाइएपछि क्रसर उद्योगहरुलाई मापदण्ड भित्र रही नदीजन्य पदार्थको उत्खनन् गर्न सुझाब दिइएको अनुगमन टोलीका सदस्य राजेन्द्र दुलालले जानकारी दिए । २ दशमलब ५ मिटर गहिराईसम्म मात्र उत्खनन् गर्नुपर्नेमा ३ मिटर गहिराइसम्म उत्खनन् गरेको र उद्योगबाट निस्किएको धमिलोपानी समेत ब्यबस्थित नगरेको पाइएपछि अनुगमन टोलीले यस्तो कार्य नगर्न क्रसर सञ्चालकलाई निर्देशन दिएको छ ।

नदी किनारबाट ५ मिटर छोडेर उत्खनन गर्नुपर्नेमा ३ मिटर मात्र छोडेर उत्खनन् गर्ने, दैनिक उत्खनन् अभिलेख नराख्ने र क्रसर सञ्चालनका विभिन्न मापदण्ड पालना नगर्ने क्रसरहरुलाई आगामि दिनमा मापदण्ड भित्र रहेर मात्र उत्खनन् गर्न निर्देशन दिइएको नगरपालिकाका प्रशासकिय अधिकृत झपेन्द्र खरेलले जानकारी दिए । नगरपालिकाका कर्मचारी ,जनप्रतिनिधि, सुरक्षा निकाय लगायतले अनुगमन गरेको थियो ।