पार्टी कार्यालयको ताला तोड्दै राखियो एमालेको बोर्ड

चौतारा । सर्वोच्च अदालतले एमाले ब्यूँताइदिएपछि सिन्धुपाल्चोकको पार्टी कार्यालयमा नेकपा एमालेले आफ्नो बोर्ड राखेको छ ।

चौतारामा रहेको पार्टी कार्यालयको मूख्य ढोकाकाे ताला तोडी नेपाल कम्युनिष्ट पार्टी (नेकपा) को बोर्ड हटाएर मंगलबार एमालेको बोर्ड राखिएको हो । ‘हामीले ढोकाको चाबी मागेका थियौं, उहाँहरुले दिन नामानेपछि ताला तोडेका हौं’, ओली पक्षबाट जिल्ला संयोजक बनेका बालकृष्ण देउजाले भने– ‘आफ्नै कार्यालयको ताला तोड्नु हाम्रो बाध्यता बन्यो ।’

अब नेकपा एमालेको कार्यभार भनेको अधिवेशन गर्नु र आफ्ना मातहतको सबै कमिटिलाई पुनगठित गर्ने रहेको भन्दै देउजाले यो दायित्व पूरा गर्न हिजो जिम्मेवारीमा रहेका जिल्ला नेताहरुको भूमिका महत्वपूर्ण हुने बताए । ‘हामीले यस अघिका अध्यक्ष झम्क नेपाललाई सदस्यमा राखेका छौं, जिल्ला अधिवेशन सम्पन्न गर्ने दायित्व उहाँहरुको पनि हो’, देउजाले भने– ‘उहाँहरु सच्चिएर आउनुहुन्छ भने हामी सहकार्य गर्दै पार्टीलाई एकढिक्का बनाएर लैजान तयार छौं ।’

कार्यालयमा एमालेको बोर्ड स्थापना पछि गरिएको कार्यक्रममा पूर्व सांसद् कृष्णराज श्रेष्ठले ३ वर्षपछि आफ्नो घरमा बस्न पाएकोमा खुसी साट्दै पार्टी कार्यालय कब्जा भएको उद्घोष गरे । ‘हामी नेकपा एमाले भनेर पुनः संगठिन हुने अवसर आएको छ’, उनले भने– ‘आजको मूख्य मकसत आज यो घर भित्र प्रवेश गर्ने र यो घरलाई हामीले कब्जा गर्ने थियो त्यो पूरा भएको छ ।’ एउटा समूहले यो कार्यालयलाई कब्जा गरेकोमा आफू सदैव दुःखित रहिरहेको सुनाउँदै उनले अरुको पुतली बनेर एमालेकै साथीहरुले गरेको शत्रुवत व्यवहारलाई अहिले चिर्न सफल भएको बताए ।

कार्यक्रममा नेकपा एमालेका पूर्व जिल्ला अध्यक्ष हस्त पण्डितले पार्टीभित्रैबाट पार्टी ढाल्ने प्रवृत्तिबिरुद्ध संसद् पुर्नस्थापना भएको बताउँदै पार्टी विभाजनले कुनै असर नपुर्याउने बताए । ‘हामी नेकपा एमालैकै स्थानमा छौं, अब विस्तारै पार्टी ध्रुविकरणतर्फ जान्छ’, उनले भने– ‘माओवादी केन्द्रका कार्यकर्तासँग कुण्ठा, निरासा छ, हामीसँग उत्साह, जोश छ । यसले नयाँ दिशामा पुर्याउने छ ।’ आगामी दिनमा नेपाली कम्युनिष्ट आन्दोलनको नेतृत्व गर्ने बताउँदै आगामी चुनावमा नेकपा एमाले पहिलो पार्टी बन्ने उनले दाबी गरे ।

बोर्ड स्थापना गर्ने कार्यक्रममा जिल्ला समन्वय समितिका उपप्रमुख बालकुमारी सापकोटा, नेता जेपी सिलवाललगायत  नेता कार्यकर्ताहरुकाे उपस्थिति थियो । आइतबार सर्वोच्च अदालतले नेपाल कम्युनिष्ट पार्टी (नेकपा) ऋषिराम कट्टेललाई दिदै एमाले र माओवादी केन्द्र ब्यूँताइदिएको थियो । सो लगत्तै एमालेले देशैभर पार्टी कार्यालयमा बोर्ड फेर्ने अभियान सञ्चालन गरेको हो ।