कम्युनिटीले मनायो वार्षिकोत्सव

मेलम्ची । मेलम्ची कम्युनिटी इङ्लिस स्कुलको १५औँ वार्षिकोत्सव विविध कार्यक्रम गरी मनाइएको छ ।

बुधबार भएको कार्यक्रमका जिल्ला शिक्षा विकास समन्वय इकाइका प्रमुख कृष्णप्रसाद सुवेदीले विद्यालयले शिक्षा क्षेत्रमा पुर्याएको योगदानको कदर गर्दै थप सफलताका लागि शुभकामना व्यक्त गरे । विद्यार्थीहरुको सर्वपक्षीय विकासका लागि विद्यालय लाग्नुपर्नेमा उनको जोड दिए ।

कार्यक्रममा कवि नवराज पराजुली र हास्यव्यङ्ग्य कलाकार राजा राजेन्द्रले आ–आफ्नो प्रस्तुतिको माध्यमबाट शिक्षा तथा मनोरञ्जन प्रदान गरेका थिए । समारोहमा रेडियो मेलम्चीका अध्यक्ष डम्बर रसिक भारतीलाई पत्रकारिता तथा साहित्यको माध्यमबाट समाजमा योगदान गरेकामा सम्मान प्रदान गरिएको छ । त्यस्तै शिक्षक वेदलाल दुलाललाई उत्कृष्ट शिक्षकका रुपमा सम्मान गरिएको थियो भने विविध विधामा उत्कृष्ट विद्यार्थीहरुलाई अवार्ड प्रदान गरिएको थियो ।

पढाइका साथसाथै विद्यार्थीहरुको प्रतिभा प्रस्फुटन गर्ने कार्यक्रमलाई निरन्तरता दिने विद्यालयका अध्यक्ष दिनेश बस्नेतले बताए । वार्षिकोत्सव स्कुलका संस्थापक अध्यक्ष पुष्कर धितालको अध्यक्षतामा भएको थियो ।