गौरवको जन्मदिनको अवसरमा चन्द्रसिंको ‘लाहुरे’ सार्वजनिक (भीडियोसहित)

काठमाण्डौ । नेपाली कला क्षेत्रका हस्ती गौरव पहरीको जन्मदिनको अवसर पारेर उनी अभिनित बहुप्रतिक्षित म्यूजिक भीडियो ‘लाहुरे’ सार्वजनिक गरिएको छ ।

एसियन म्युजिकले बजारमा ल्याएको सो भीडियोमा गौरवलाई लक्ष्मी वर्देवाले साथ दिएकी छिन् । चन्द्रसिं घले र रानी शाक्यको श्वरमा रहेको गीतको शब्द गायक घले स्वयम्को छ । शैलेन्द्र प्रधानले संगीत एरेन्ज गरेका छन् भने गीतको भीडियोलाई उत्सव दाहालले छायाङ्कन गरेका हुन् । निशान कस्यपको निर्देशनमा बनेको भीडियोमा विदेशिने युवाहरुको व्यथालाई उतारिएको छ ।

‘मैले अभिनय गरेको भीडियोहरुमा यो विशेष रहेकाले जन्मदिनको अवसरमा सार्वजनिक गरिएको हो’, भीडियो सार्वजनिक भएलगत्तै प्रतिक्रिया दिँदै गौरव पहरीले भने– ‘खास दिनमा खास भीडियो सार्वजनिक भएकोमा खुसी छु ।’ भीडियोलाई सबै दर्शकहरुले मनपराउने अपेक्षा गरेको उनले सुनाए ।

‘नेपाली युवाहरुले विदेशमा भौग्दै आएको दुःख र त्यसले परिवारमा निम्त्याएको नैरस्यतालाई नै गीतमा उनिएको हो’, भीडियो सार्वजनिक पछि प्रतिक्रिया दिँदै गायक एवम् गीतकार चन्द्रसिं घलेले भने– ‘यो गीतमा मैले प्रत्यक्ष अनुभव गरेको कुरालाई समेटेको छु ।’ आफ्नो नजिकको साथीले विदेशमा भोग्नु परेको नियतिलाई गीतमा उतारिएको उनले खुलाए । ‘हामी सबैको साझा व्यथालाई गीतमार्फत उतारेका छौं’, घलेले भने– ‘पक्कै पनि यसलाई स्रोता, दर्शकले मनपराउनु हुनेछ ।’

एसियन म्युजिकका सञ्चालक ईश्वर गुरुङले युवावर्गले भोगिरहेको पीडालाई समेटेर तयार पारिएको गीत र भीडियोले अहिलेको नेपाली समाजको चित्र देखाउने दाबी गरे । एशियन म्युजिकको अफिसियल युट्युव च्यानलबाट सार्वजनिक गरिएको भीडियो अमेजन प्राईम म्युजिक, जिओ सावन, स्पोर्टी, एप्पल म्युजिक, गाना, व्वाएङक म्युजिक, रेस्सो, आईट्युन स्टोर, आईहार्ट रेडियो र टिकटकमा हेर्न र सुन्न सकिनेछ ।
नेपाली पप गायक चन्द्रसिं घलेले दुई दर्जन बढी गीत नेपाली संगीत क्षेत्रलाई दिईसकेका छन् । उनको ‘साहारा बनिदेउ’ गीतले विभिन्न राष्ट्रिय स्तरको अवार्ड प्राप्त गरिसकेको छ । सिन्धुपाल्चोकको चौताराका स्थायी बासिन्दा घलेले औपचारिक रुपमा २०६४६५ तिरबाट आफ्नो सांगीतिक यात्रा सुरु गरेका हुन् ।

गायक, मोडल, संगीतकार, निर्देशक र गीतकारको छवी बनाएको उनको पहिलो गीत ‘खेल यो बन्दुकको’ खुबै रुचाईएको थियो । ओ प्रिया, सुनचाँदी, राजा रानी, यो मनले, डिस्को डान्स, उडाउला पछ्यौरी तिम्रो, पिउँदापिउँदै, जय सिन्धुभूमिजस्ता गीत चर्चामा छन् ।

हेर्नुस् ‘लाहुरे’ को भीडियोः