उत्कृष्ट काम गर्ने १० प्रहरी पुरस्कृत

चौतारा । जिल्ला प्रहरी कार्यालय सिन्धुपाल्चोकले सञ्चालन गर्दै आएको ‘टी विथ गेष्ट’ कार्यक्रममा उत्कृष्ट काम गर्ने १० प्रहरीलाई पुरस्कृत गएिको छ ।

प्रमुख जिल्ला अधिकारी अरुण पोखरेलकोे प्रमुख आथित्यतामा भएको कार्यक्रममा ईमान्दारी, अनुशासित भई उत्कृष्ट ढङ्गबाट कार्य सम्पादन गरेको भन्दै कदर स्वरुप १० जनालाई पुरस्कृत गरिएको प्रहरी नायव उपरीक्षक प्रकाश सापकोटाले जानकारी दिए । पुरस्कृत हुनेमा प्र.ना.नि. राम प्रगास राय, प्र.स.नि. कृष्णप्रसाद पौडेल, प्र.स.नि. उमेशप्रसाद थपलिया, प्र.ह. दिनेश स्याङ्तान, प्र.ह. कान्छा गिरी, प्र.ज. श्याम प्रसाद अधिकारी, प्र.ज. दुखा महतो थारु, प्र.ज. पोखराज पकुवाल, प्र.ज. डोरबहादुर माझी र प्र.ज. रेवत बरुवाल रहेका छन् ।

सोहि अवसरमा प्रहरी जवान रेवत बरुवाललाई फागुन महिनाको उत्कृष्ट प्रहरी घोषिग गरी पुरस्कार प्रदान गरिएको थियो । इमान्दार रुपमा काम गर्ने प्रहरी कर्मचारीहरुलाई मूल्याङ्कन गर्दे पुरस्कृत हुँदा उनीहरुको मनोबल उच्च हुने र पेशा प्रति अझै लगनशिल भएर कार्यक्षेत्रमा खटिने भएकाले पुरस्कृत गरिएको सापकोटाले बताए ।

‘टी विथ गेष्ट’ कार्यक्रमले प्रहरी कर्मचारीहरुको तनाव व्यवस्थापन गर्ने र कर्मचारीहरुबीच भावनात्मक निकटता बढाउने जनाउँदै महिनाको एक पटक यो कार्यक्रम गर्ने गरिएको छ । कार्यक्रममा नृत्य, गजल, गीत, चुट्किला जस्ता सांस्कृतिक प्रस्तुति गरिएको थियो ।

सो कार्यक्रममा गोरख बक्स गणका प्रमुख सेनानिनिर्मल कुमार श्रेष्ठ, १६ नं. गण हेडक्वाटर सशस्त्र प्रहरीबल वनदेउका स.प्र.उ. अर्जुन खत्री, राष्ट्रिय अनुसन्धान कार्यालय सिन्धुपाल्चोकका प्रमुख अनुसन्धान अधिकृत सरोजकुमार निरौला, जिल्ला प्रशासन कार्यालय सिन्धुपाल्चोकका प्रशासकीय अधिकृत सुनिता पहरीलगायतको उपस्थिति थियो ।