शिक्षकले गर्यो जिल्ला परिषद् समन्वय समिति घोषणा

चौतारा । माओवादी केन्द्र निकट शिक्षक संगठन एकीकृत अखिल नेपाल संगठनको प्रथम जिल्ला परिषद् भेला सम्पन्न भएको छ ।

भेलाले १ सय ५१ जिल्ला परिषद् समन्वय समिति समेत घोषणा गरेको छ । जिल्ला अध्यक्ष निलप्रसाद सुवेदीको अध्यक्षतामा नेपाल कम्युनिष्ट पार्टी माओवादी केन्द्रको केन्द्रिय सदस्य माधव सापकोटाको प्रमुख अतित्थ्यमा चौतारामा शनिबार भेला गरिएको थियो ।

भेलामा संगठनका अध्यक्ष निलप्रसाद सुवेदीले हालसम्म गरेका कार्यक्रम तथा आगामी संगठनको योजना प्रस्तुत गरेका थिए । कार्यक्रममा बोल्दै प्रमुख अतिथि माधव सापकोटाले माओवादी आन्दोलनको पुनः सशक्त ढंगले उठाउने यो अभियानमा क्रान्तिकारी शिक्षकहरुको महत्वपूर्ण भुमिका रहेने बताए ।

‘पार्टीलाई रचनात्मक सल्लाह सुझाव दिने संगठन शिक्षक संगठन हो’, उनले भने– ‘नेतृत्वको विकास गर्ने पार्टीको नीति कार्यक्रम समुदायसम्म लाने प्रभावकारी संगठन शिक्षकहरुको हो, त्यो दिशातर्फ लाग्न सबै शिक्षकहरुलाई आग्रह गर्दछु ।’ बामपन्थी आन्दोलनमा शिक्षकहरुले विगत देखीनै महत्वपूर्ण भूमिका खेल्दै आएको नेता सापकोताले स्मरण गरे । उनले पार्टीको नेतादेखि कार्यकर्तासम्म सुद्धिकरण हुदै संगठनलाई सुद्रृढीकरण गर्दै पार्टी वनाउने अभियानमा लाग्न उनले अपिल समेत गरे ।

कार्यक्रममा बोल्दै विशेष अतिथि इन्द्रराज सापकोटाले हामी शिक्षकहरु असल शिक्षक बन्न सक्नुपर्ने बताए । कार्यक्रममा जिल्लाभरका शिक्षकहरुको उपस्थिति थियो ।