हाटबजार सञ्चालन गर्न कृषकको माग

चौतारा । ‘यहाँको उत्पादनले बजार पाउन सकेको छैन, उत्पादन तर उत्पादित सामग्री त्यतिकै खेर गईरहेको अवस्था छ’, चौतारा साँगाचोकगढी नगरपालिका– ५ का स्थानीय शिव श्रेष्ठले भने– ‘मूख्यगरी बजारिकरणमा स्थानीय सरकारले ध्यान दिन जरुरी छ ।’ उनले स्थानीय सरकारको पहलमा हाटबजार सञ्चालन हुनुपर्नेमा जोड दिए ।

श्रेष्ठले मात्रै होईन चौतारा साँगाचोकगढी नगरपालिकाले सोमबार वडा नं. ५ मा गरेको लगानी प्रबद्र्धन कार्यक्रममा अधिकांशले स्थानीय सरकारले उत्पादनको बजारिकरणमा जोड दिन आग्रह गरे । ‘हामीकहाँ सम्भावनाको प्रचुरता छ, कृषि पर्यटन, होमस्टे सञ्चालन हुन सक्छ । तरकारी, फलफूल, मासु, दुग्धजन्य सामग्री पनि उत्पादन भईरहेको छ’, स्थानीय कुमार श्रेष्ठले भने– ‘तर उत्पादन भएका सामग्रीले बजार पाईरहेका छैनन् ।’ जसका कारण कृषकहरु निरास भईरहेको उनले सुनाए ।

‘हामीकहाँ लप्सी मनग्यै उत्पादन हुन्छ, तर त्यसको उचित उपयोग हुन सकिरहेको छैन’, ५ कै अर्का कृषक लक्ष्मण घलेले भने– ‘सम्भावनाको कुरा गरेर मात्र हुन्छ, त्यसलाई व्यवस्थित पनि बनाउन जरुरी छ ।’ आफ्नो क्षेत्रमा अलैंची, बाख्रा पालन, तरकारी खेतीको सम्भावना रहेको बताउँदै सिंचाईको सुविधा हुने हो भने कृषितर्फ युवाहरु आकर्षित हुने बताए ।

यता नारायणथान क्षेत्रमा धार्मिक पर्यटकीय क्षेत्र बनाउन सकिने भन्दै स्थानीय कमलचरण कक्षपतिले त्यसतर्फ स्थानीय सरकारको ध्यान दिनुपर्नेमा जोड दिए । ‘पुरानो इतिहास बोकेको मन्दिर, त्यसको छेवैमा रहेको पार्क, पिकनिक स्पोर्टजस्ता कुराले नारायणथान क्षेत्रलाई धार्मिक पर्यटकीय क्षेत्रको रुपमा विकास गर्न सकिन्छ’, उनले भने– ‘यसका अवला सो क्षेत्रमा वनपैदावार बढी रहेको ओसिलो ठाउँ भएकाकारण अलैंची खेति पनि गर्न सकिन्छ ।’ एउटा नीति निर्माण गरेर अगाडि बढ्ने हो भने लगानी भित्रने सम्भावना पनि रहेको उनले सुनाए ।

कार्यक्रममा अधिकांश कृषकले बाँदरले दुःख दिएको गुनासो गरेका थिए । ‘उत्पादनको फल लिने बेला बाँदरले सत्यानास पारिदिन्छ’, स्थानीय नेत्रबहादुर नेत्रबहादुर घलेले भने– ‘अहिलेको मूख्य समस्या बाँदर भएर निस्किएको छ, यसलाई नियन्त्रण गर्न आवश्यक पहल गर्न जरुरी छ । कार्यक्रममा कृषकहरुले वडा नं. ५ भित्र लप्सी, कागती, सुन्तोला, तरकारी, अलैंची, बाख्रा पालन, कुखुला पालन, भैंसीपालन, फर्निचर उद्योग, पर्यटनजस्ता पाटोमा सम्भावना रहेको जनाएका थिए ।

लगानी प्रबद्र्धन कार्यक्रममा चौतारा साँगाचोकगढी नगरपालिकाका प्रमुख प्रशासकीय अधिकृत फडिन्द्रप्रसाद पौडेलले कृषकले उत्पादन गरेको सामग्रीले बजार नपाउनु दुर्भाग्य भएको बताए । ‘हामीकहाँ करोडौ रुपैंया बराबरका सामग्री बाहिरबाट आयात हुन्छ’, उनले भने– ‘तर स्थानीय स्तरमा उत्पादन भएका सामग्रीले बजार नपाउने अवस्था छ, यो दुर्भाग्यपूर्ण कुरा हो ।’ नगरले यस्ता समस्याको समाधानमा पहल गर्ने उनले बताए ।

स्थानीयको समस्या र गुनासोलाई सम्बोधन गर्दै नगरप्रमुख अमानसिं तामाङले जनताको जीवनस्तर नउठ्दासम्म विकास नहुने बताए । ‘यहाँ थुप्रै समस्याहरु छन्, तर मूख्य कुरा जनताको जीवनस्तर उक्सनु हो’, उनले भने– ‘त्यसो भएन भने विकासको महत्व हुँदैन, समृद्धि प्राप्त हुँदैन ।’ कृषकलाई व्यवस्थित बनाउन उत्पादनको आधारमा अनुदान दिने नीति नगरले अघि सारेको भन्दै उनले कृषकले गरेको उत्पादनको जिम्मा नगरले लिने बताए ।

‘हामीले बजारिकरणलाई व्यवस्थित बनाउन कोल्ड स्टोर र कृषि संकलन केन्द्र निर्माण गर्न लागेका छौं, यसले कृषकलाई केहि हदसम्म राहत दिनेछ’, उनले भने– ‘जस्को ठेक्का प्रकृया अघि बढिसकेको छ ।’ पर्यटन, कृषि, शिक्षा, स्वास्थ्य क्षेत्रमा नगरले उल्लेख्य काम गरेको भन्दै तामाङले कृषकहरु अल्छिपनाकै कारण पछि परिरहेको बताए ।

कार्यक्रममा वडाभरका कृषकहरु, जनप्रतिनिधि, विभिन्न संघसंस्थाका प्रतिनिधि, बुद्धिजीवि, सञ्चारकर्मीहरुको उपस्थिति थियो ।