सिन्धुपाल्चोकमा पहिलो पटक औद्योगिक ग्राम बन्ने

चौतारा । सिन्धुपाल्चोकमा पहिलो पटक औद्योगिक ग्राम बन्ने भएको छ । चौतारा साँगाचोकगढी नगरपालिका– ४ देउरालीमा औद्योगिक ग्राम बन्ने भएको हो ।

४० रोपनी क्षेत्रफल समेट्ने उक्त औद्योगिक ग्राम निर्माणका लागि नगरपालिका र उद्योग वाणिज्य तथा आपूर्ति मन्त्रालयबीच सम्झौता भइसकेको छ । सम्झौता अनुसार औद्योगिक ग्रामका लागि मन्त्रालयले ९२ लाख बजेट उपलब्ध गराएको छ । उक्त रकमले यस वर्ष जग्गा तयारी (फाउन्डेसन तयारी) गरिने नगरप्रमुख अमानसिं तामाङले जानकारी दिए ।

नगरपालिकाले उक्त क्षेत्रमा प्राविधिकहरूसहित स्थलगत निरीक्षण गरेको छ । नगरप्रमुख तामाङसहित नगर सल्लाहकार चन्द्र सापकोटा, प्रमुख प्रशासकीय अधिकृत फणीन्द्रप्रसाद पौडेल, इन्जिनियर बद्रीनारायण भुजेल लगाएत प्राविधिकहरुको टोलीले औद्योगिक ग्राम निर्माण गरिने स्थल निरीक्षण गरेका छन् । नगर प्रमुख तामाङका अनुसार एक साता भित्र ग्रामको पूर्वाधार निर्माण गर्न बोलपत्र आह्वान गरिने छ ।
स्थलगत निरीक्षण पछि प्राविधिकसहितको टोलीले निर्माणाधिन औद्योगिक ग्राममा कृषि उत्पादन प्रशोधन उद्योग, डेरी उद्योग, जडिबुटी प्रशोधन उद्योग, काठ तथा बाँस बाट बन्ने उत्पादनमुलक उद्योग, खानी तथा खनिजमा आधारित उद्योग सञ्चालन गर्न सकिने जनाएको छ ।
त्यस्तै औद्योगिक ग्राममा पानी प्रशोधन उद्योग, विभिन्न प्रकारका मेसिन तथा मेसिनरी उद्योग, प्राविधिक, सीपमूलक कार्यमा आधारित सामग्री उद्योग, सफ्टवेयर सामग्री उत्पादन, स्थानीयहरूको मागमा आधारित अन्य उद्योग रहने जनाईएको छ ।

‘मूख्यतः स्थानीय स्तरमा उपलब्ध हुो कच्चा पदार्थ, अर्धप्रशोधित कच्चा पदार्थ र खेर गएका वस्तु प्रयोग गरी उत्पादन गरिने उद्योगलाई प्राथमिकता दिईने छ’, इन्जिनियर बद्रीनारायण भुजेलले भने– ‘यो सिन्धुपाल्चोककै पहिलो औद्योगिक ग्राम हुने हुँदा हामीले विशेष ध्यान दिईरहेका छौं ।’ उद्योग सञ्चालनको लागि महिला उद्यमी वा ३० वर्ष भन्दा कम उमेरका युवा उद्यमीलाई पहिलो प्राथमिकता दिईने उनले बताए ।