बहुप्राविधिक महाविद्यालयको भवन निर्माण हुने

चौतारा । सिन्धुपाल्चोकको चौतारास्थित छाप आहालडाँडामा दिनेश–रामजी बहुप्राविधिक महाविद्यालयको भवन निर्माण हुने भएको छ ।

बहुप्राविधिक महाविद्यालय निर्माणका लागि सामुदायिक वनको करिब १८ रोपनी क्षेत्रफल नेपाल सरकारबाट प्राप्त भएपछि भवन निर्माणको प्रक्रिया शुरु भएको हो । भवन निर्माणका लागि सोवण निर्माण सेवा कम्पनीसँग हालै ठेक्का सम्झौता भएको छ । पहिलो चरणमा रु १० करोड ९३ लाखको लागतमा बाइस महिनाभित्र निर्माण सम्पन्न हुने तीन वटा भवनमा १२ कक्षाकोठा, कम्प्युटर कोठा र कर्मचारी कोठा हुने वाग्मती प्रदेश सामाजिक विकास मन्त्रालयअन्तर्गत सार्वजनिक निर्माण कार्यान्वयन एकाइले जनाएको छ ।

सम्झौता अनुसार ५ सय मिटर पहुँचमार्गसमेत निर्माण गर्नुपर्ने एकाइका इन्जिनीयर राजन श्रेष्ठले बताए। उनका अनुसार बहुवर्षीय योजनाअन्र्तगत महाविद्यायको सम्पूर्ण संरचना निर्माणका लागि रु एक अर्ब ३४ करोड ६१ लाख बराबरको विस्तृत परियोजना प्रतिवेदन (डिपिआर) तयार भएको छ ।

बास्केटबल र भलिबल खेलमैदान, तारबार घेराबन्दी, पाहुना घर, छात्रावास भवन, कर्मचारी आवास गृह, चमेना गृह, पुस्तकालय तथा व्यापारिक भवनसमेत निर्माण गरिने योजना रहेको बताइएको छ ।

योद्धाको नाममा प्राविधिक शिक्षालय

बहुप्राविधिक शिक्षालय १० वर्षे सशस्त्र विद्रोहमा मारिएका कमल शर्मा (दिनेश) र गोविन्द शर्मा(रामजी)को नामबाट स्थापना भएको हो । २०६१ सालमा सिराहाको बन्दीपुरमा भएको भिडन्तमा दुवैको निधन भएको थियो । दिनेश त्यतिबेला बटालियन कमान्डर थिए भने रामजी कमिसार थिए । १० वर्षै युद्धमा सिन्धुपाल्चोकबाट माओवादीमा सहभागी भएकामध्ये सबैभन्दा उपल्लो पदमा पुगेर मृत्यु हुनेमा ती दुई जना थिए ।