तीन दिने खोज पत्रकारिता तालिम सम्पन्न

चौतारा । पत्रकारहरुलाई खोजी समाचार लेख्न सिकाउने उद्देश्यले आयोजना गरिएको आधारभूत खोजपत्रकारिता तालिम सम्पन्न भएको छ ।

चौतारा साँगाचोकगढी नगरपालिकाको वडा नं. ५ स्थित होटल जुगल इनमा भएको सो तालिम वैशाख १९ बाट सञ्चालन भएको थियो । शब्दालय पब्लिकेशन एण्ड मिडिया नेटवर्क प्रा.लि.ले आयोजना गरिएको सो तालिमलाई चौतारा साँगाचोकगढी नगरपालिकाले सहयोग गरेको हो ।

तीन दिनसम्म चलेको तालिममा आफूले पत्रकारिताको क्षेत्रमा पहिचानजनित खोज पत्रकारिताको बारे स्पष्ट हुन सकेको सहभागि चौतारा साँगाचोकगढी नगरपालिका– ८ की सुमित्रा श्रेष्ठले बताईन् । ‘खोज पत्रकारिता त छँदै छ, त्यो मध्ये पनि पहिचानजनित खोज पत्रकारिता आवश्यक छ’, उनले भनिन्– ‘हामीले खोजेकै विषय सिक्न पाएकाले उत्साह बढेको छ ।’

आधारभूत पत्रकारिता, पत्रकारिताको सामान्य सिद्धान्तदेखि समाचार लेखन, खोज पत्रकारिता र पहिचानजनित खोज पत्रकारिताको बारेमा कार्यशाला सञ्चालन गरी छलफलको माध्ययबाट तालिम सञ्चालन गरिएको तालिमका मूख्य प्रशिक्षक एवम् नेपाल पत्रकार महासंघ केन्द्रिय परिषद् सदस्य ज्ञानेन्द्रप्रसाद तिमल्सिनाले बताए ।

तालिम अन्र्तगत समाचार लेखन कार्यशालामा उत्कृष्ट समाचार लेखेका ३ जनालाई पुरस्कृत समेत गरिएको थियो । उत्कृष्ट समाचार लेखन पुरस्कारबाट कृतिका महत, मेहनती समाचार लेखन पुरस्कारबाट रमेश श्रेष्ठ र सक्रिय समाचार लेखन पुरस्कारबाट सुमनी श्रेष्ठलाई पुरस्कृत गरिएको शब्दालयका अध्यक्ष सुन्दर शिरीषले जानकारी दिए । तीन सदसीय मूल्याङ्कन टोलीले प्रशिक्षार्थीहरुको समाचारलाई मूल्याङ्कन गरी उत्कृष्ट छनौट गरेको थियो ।

तालिमको उद्घाटन समाराेहलाई सम्बाेधन गर्दै  चौतारा साँगाचोकगढी नगरपालिकाका सामाजिक विकास शाखाका संयोजक एवम् वडा नं. १३ का वडा अध्यक्ष रामप्रसाद गौतमले पत्रकारितामार्फत समाजको ससाना विषयलाई उजागर गर्नुपर्ने जोड दिएका थिए । ‘पत्रकारिता समाजको ऐना भएको कारण सबैखालका समाचार आउनस पर्दछ’, गौतमले भने– ‘अझ खोज पत्रकारिताले त समाजका ससाना विषयवस्तुहरुलाई समेत सञ्चारमाध्यममा ल्याउनु पर्दछ ।’

सो तालिमको उद्घाटन सत्रमा चौतारा साँगाचोकगढी नगरपालिकाका कार्यपालिका सदस्य सागर परियार, वरिष्ठ पत्रकार सुरेश कसजू, विद्यार्थी नेता मिलन लामा लगायतले शुभकामना प्रदान गरेका थिए । तालिम स्वास्थ्य मापदण्ड पालना गरी सञ्चालन गरिएको थियो ।