तातोपानी आइपुग्यो १८ हजार अक्सिजन सिलिण्डर

तातोपानी । नेपाललाई चीन सरकारले सहयोग स्वरुप उपलब्ध गराएको १८ हजार थान अक्सिजन सिलिण्डर तातोपानी नाकामा आईपुगेको छ ।

सो परिणामको सिलिण्डर तातोपानी नाकामा आइपुगेको उपप्रधानमन्त्री ईश्वर पोखरेलको सचिवालयले जनाएको छ । तातोपानी नाकासम्म आइपुगेको अक्सिजनका सिलिण्डरहरूलाई काठमाडौं पुर्याउने तयारी भइरहेको जनाईएको छ । नेपाल सरकारको अनुरोधमा चीन सरकारले ती सिलिण्डरहरू सहयोग स्वरुप उपलब्ध गराएको हो । चीन सरकारले उपचारमा सहयोग पुगोस भनेर सिलिण्डरहरू नेपाललाई दिएको हो ।

यता तातोपानी भन्सार कार्यालयले भने कति परिणाममा सिलिण्डर आएको हो एकीन तथ्याङ्क प्राप्त नभएको जनाएको छ । ‘नाल्यम भन्सारबाट सामान अगाडि बढेको अनौपचारिक जानकारी आएको छ’, भन्सार प्रमुख नारदमणी गौतमले भने– ‘सिलिण्डर कति परिमाणमा आएको भन्ने एकीन जानाकारी आएको छैन ।’ सो सिलिण्डर साँझसम्म सीमा क्षेत्रमा आइपुग्ने उनले बताए । गौतमका अनुसार निजी क्षेत्रले मगाएको ७५ सय अक्सिजन सिलिण्डर पनि साँझनै आइपुग्ने छ ।

सीमामा आएको समान तुरुन्त अनलाइन मार्फत जानकारी हुने र त्यसलाई छिटो प्रक्रियाबाट काठमाडौ पठाइने गौतमले जनाए । ‘सबै कुरा सहज भए सोमबारसम्ममा ती सामग्री काठमाडौ पुग्छ’, उनले भने । नेपालमा अक्सिजन अभावको कारण अस्पतालहरूमा कोरोनाका बिरामीलाई उपचार गर्न समस्या भइरहेको बेला चीनले दिएको अक्सिजनले उपचारमा ठुलो सहयोग मिल्ने छ । यसै गरि सरकारले अक्सिजनको अभाव हुन नदिन देशमै अक्सिजन प्लान्टदेखि देशका विभिन्न ठाउँमा प्रयोग विहिन भएका अक्सिजन सिलिण्डर समेत जम्मा गरिरहेको छ ।