एकै टोलमा २७ कोरोना पोजेटिभ, डाक्टरहरुद्वारा औषधी प्याकेज वितरण

चौतारा । सिन्धुपाल्चोकको चौतारा साँगाचोकगढी नगरपालिका– ७ स्थित कल्लेरीका २७ जनामा कोरोना पोजेटिभ देखिएको छ ।

एकै ठाउँको २७ जनामा कोरोना पुष्टि भएपछि सोहि ठाउँका डा. राजकुमार दंगाल, डा. विनोद दंगाल र डा. अर्चना केसीले संक्रमितहरुलाई मास्क सेनिटाईजरसहित औषधी प्याकेज वितरण गरेका छन् । आफ्नो मातृभूमिमा कोभिड– १९ को भयावह स्थिति देखिएका कारण संक्रमितहरुलाई सुरक्षित बनाउन सो सामग्री सहयोग गरेको डा.राजकुमार दंगालले बताए ।

उनीहरुको सिफारिस र आर्थिक सयोगमा कोरोना पोजेटिभ देखिएको २७ जनालाई औषधी प्याकेज वितरण गरिएको हो । ‘हामीले आफ्नो गाउँमात्र होईन जिल्लामै कोरोना नियन्त्रणको लागि केहि गर्नेबारे योजना बनाईरहेका छौं’, डा. विनोद दंगालले भने– ‘महामारीको यस्तो अवस्थामा हामी सबैले सकेको सहयोग गर्नुपर्दछ ।’

उनीहरुले पठाएको स्वास्थ्य सामग्री सञ्चारकर्मी ध्रुव दंगाल र स्वास्थ्यकर्मी सूर्यप्रसाद घोरासैनीले संक्रमितको घरघरमै गएर वितरण गरेका थिए । कोरोना पोजेटिभ देखिनेहरुमा ४ वर्षको वालकदेखि ७५ जनाको बृद्धासम्म रहेका छन् ।

गएको बैशाख २८ गते राती सोहि ठाउँका एक बृद्धको मृत्यु भएको थियो । मृत्युपछि उनी कोरोना संक्रमित रहेको पुष्टि भएको थियो । २९ गते कम्ट्याक ट्रेसिङको आधारमा स्वाव सो ठाउँका १ सय ४९ जनाको स्वाव संकलन गरिएको थियो । आइतबार आएको रिपोर्टमा २७ जनामा कोरोना पोजेटिभ देखिएको हो ।