सिन्धु पत्रकार महासंघले गर्यो सिलिण्डर हस्तान्तण

चौतारा । नेपाल पत्रकार महासंघ सिन्धुपाल्चोक शाखाले अक्सिजन सिलिण्डर हस्तान्तरण गरेको छ । शनिबार १ सय ४२ थान भरेको अक्सिजन सिलिण्डर हस्तान्तरण गरिएको हो ।

जिल्लामा कोभिड १९ का संक्रमितहरु बढ्नाका साथै अक्सिजनको अभाव भएपछि महासंघले जिल्ला अस्पताल चौतारा, सदावहार अस्पताल खाडीचौर र जिल्ला कोभिड संकट व्यवस्थान केन्द्र, सिन्धुपाल्चोकलाई हस्तारण गरेको हो । महासंघका अध्यक्ष जीवन श्रेष्ठले चौतारा अस्पताल व्यवस्थापन समितिका अध्यक्ष इश्वरी श्रेष्ठ र मेडिकल सुपरिटेण्डेट डा. करुणा बज्राचार्यलाई संयुुक्तरुपमा २५ थान र जिल्ला कोभिड– १९ संकट व्यवस्थापन केन्द्रका सदस्य एसपी राजन अधिकारीलाई ९२ थान अक्सिजन सिलिण्डर हस्तान्तरण गरेका हुन् ।

जिल्लामा अक्सिजन प्लान्ट नभएको र अक्सिजन भर्न समस्या भएपछि महासंघले स्थापना गरेको ‘पत्रकार महासंघ कोभिड– १९ राहत कोषबाट सिलिण्डरहरु संकलन गरि सुनसरी भर्न पठाएको थियो । कारोना भाइरसको दोस्रो लहर सुरु भएपछि जिल्लाका पत्रकारहरुलाई उपचार र राहत दिने उदेश्यले स्थापना गरेको कोषबाट संक्रमित ६ जना पत्रकारलाई उपचार खर्च पनि उपलव्ध गराईसकेको अध्यक्ष श्रेष्ठले जानकारी दिए । कोषमा हालसम्म १४ लाख बढी रकम संकलन भईसकेको महासंघले जनाएको छ ।