बर्खा अघिनै काठमाण्डौ जोड्ने चौतारा–झ्याडी सडक कालोपत्रे गरिने

चौतारा । जिल्ला सदरमुकाम चौतारादेखि राजधानी काठमाडौँ जोड्ने सबैभन्दा छोटो दुरीको चौतारा–सीपाघाट–कात्तिके–काठमाण्डौ मोटरबाटो अन्र्तगत चौतारादेखि सानोसिरुवारीसम्म बर्खा अघिनै कालोपत्रे हुने भएको छ ।

सडक खण्ड अन्र्तगत पहिलो चरणको चौतारा–झ्याडी भित्र पर्ने १० किलोमिटर भित्रको सो खण्डमा कालोपत्रे हुने भएको हो । सानोसिरुवारीदेखि झ्याडीसम्म भदौ भित्रमा कालोपत्रे सक्ने जनाईएको छ । शुक्रबार बागमती प्रदेशको सांसद् युवराज दुलाल, नेकपा माओवादी केन्द्रका केन्द्रिय सदस्य माधव सापकोटा, स्थानीय जनप्रतिनिधि, आयोजनाका प्रतिनिधि, प्राविधिकसहितको टोलीले सडकको अनुगमन गरेको हो । कालोपत्रे गर्नको लागि सबबेस गुणस्तरीय छ कि छैन भन्ने अनुगमन गरिएको थियो ।

सांसद दुलाल स्वयम्ले पिकले खनी सडकको जाँच गरेका थिए । ‘कालोपत्रे हुन लागेको अवस्थामा हामीले अहिले सबबेस गुणस्तरीय छ कि छैन भनेर जाँच गरेका हौं’, सांसद् दुलालले भने– ‘अनुगमनबाट सडक गुणस्तरीय बनाउन कोशिस भईरहेको पाईएको छ ।’ केहि कमी कमजोरी र अनुगमनको क्रममा देखेका कुराहरु आयोजना प्रमुख र निर्माण व्यवसायीलाई जानकारी गराउँदै सुधार गर्न सुझाव दिने दुलालले बताए ।

‘विकास निर्माणको आयोजनाहरुमा गुणस्तर कायम होस्, डिजाईन, स्टमेट अनुसारको काम होस् भन्ने मूख्य धेय रहेको छ’, दुलालले भने– ‘जिल्लाको विकास दिगो विकासको मोडलमा लैजानको लागि हामी प्रयत्नशिल छौं ।’ जनप्रतिनिधिहरु, स्थानीय, सबै सरोकारवालाहरुले बाटो गुणस्तरीय बनाउनको लागि भूमिका निर्वाह गर्नु पर्ने जनाउँदै दुलालले त्यसको लागि सक्रिय रहन आग्रह गरे ।

चौतारा–सीपाघाट–कात्तिके–काठमाण्डौ मोटरबाटो अन्र्तगत पहिलो चरणको चौतारा–सिपाघाट सडककखण्ड मध्ये चौतारा–झ्याडी खण्डको १० किलोमिटर कालोपत्रे यो आर्थिक वर्षभित्र सम्पन्न गर्ने लक्ष्य रहेको भएपनि सिरुवारीबाट झ्याडीसम्म अलि बढी कटिङ भएको कारण बर्खामा पहिरो गएर क्षति पुग्न सक्ने देखिएकोले बर्खा पछि मात्रै कालोपत्रे सुरु गर्ने चौतारा साँगाचोकगढी नगरपालिका– ७ का वडा अध्यक्ष उमाप्रसाद दुलालले जानकारी दिए । ‘ग्राभेल चाहिँ बर्खा अघिनै सम्पन्न गर्ने गरी काम भईरहेको छ’, दुलालले भने– ‘बर्खा सकिएलगत्तै कालोपत्रे सुरु हुन्छ ।’

२६ करोडमा सोवर्ण निर्माण सेवाले यो सडक खण्डको काम गरिरहेको छ । अरनिको राजमार्गको विकल्पसमेत ठानिएको यो सडक स्त्तरोन्नति गर्ने काम भईरहेको छ । कुल ५६ किलोमिटर लामो यो सडक प्रदेश सरकारको बजेटबाट कालोपत्रे तथा स्त्तरोन्नति थालिएको हो ।

त्यस्तै शुक्रबारनै चौतारा साँगाचोकगढी नगरपालिका– ७ सानोसिरुवारीको भूतछाँगामा बन्दै गरेको सिँडीको पनि अनुगमन गरिएको छ । सो क्षेत्रलाई पर्यटकीय क्षेत्र बनाउने उद्देश्यले बागमती प्रदेश सरकारले ५० लाख बिनियोजन गरी सिँडी निर्माण कार्य भईरहेको छ ।