संस्कृति जोगाउन जुटे नेवार समुदायका महिला

चौतारा । नेवारी संस्कृति र परम्परा जोगाउन चौतारा साँगाचोकगढी नगरपालिका– ५ का नेवार समुदायका महिलाहरु जुटेका छन् ।

संस्कृति जोगाउने उद्देश्यले शनिबार चौतारामा नेवार समुदायका महिलाहरुलाई नेवारी परिकार बनाउने तालिम दिएको छ । नेवार समुदायमा यो सीपको अभाव देखिएकोले तालिमको आयोजना गरिएको नेवाः मिसा दबू चौतारा साँगाचोकगढी नगरपालिकाकी अध्यक्ष कमला श्रेष्ठले बताईन् । तालिममा २० जना महिलाहरु सहभागि थिए ।

तालिमको समापन गर्दै चौतारा साँगाचोकगढी नगरपालिकाका प्रमुख अमानसिं तामाङले परम्परादेखि नै नेवार समुदाय खानेकुराको विविधताका लागि प्रख्यात रहेको बताउँदै आफ्नो संस्कृतिको साथै परिकारहरु जोगाउनु पर्ने बताए । ‘हामीले हाम्रो संस्कृति जोगाउन सकेनौ भने कहिल्यै समाज विकास हुँदैन’, तामाङले भने– ‘संस्कृति जोगाउन महिलाहरुको मूख्य भूमिका हुन्छ, त्यसैले महिलाहरु एकजुट हुनुपर्दछ ।’ महिलाहरु एकजुट भएर आए नगरपालिकाले सदैव सहयोग गर्ने उनको भनाई थियो ।

त्यस्तै कार्यक्रममा चौतारा साँगाचोकगढी नगरपालिका वडा नं. ५ का अध्यक्ष नरमान श्रेष्ठले नोवारी सीपलाई आयअर्जनसँग जोड्नुपर्ने धारणा राखे । ‘हामीसँग सीप छ, तालिम लिएका छौं, त्यसलाई आयाआर्जनको बाटो बनाउनुपर्दछ’, श्रेष्ठले भने– ‘त्यसको लागि नेवारी संस्कृति र परिकार राखेर होमस्टे निर्माण गर्न सकिन्छ ।’

कार्यक्रममा नेवाःदेय्ःदवुका केन्द्रिय सदस्य हरिकुमार श्रेष्ठ, कृष्णरत्न गंगा माविका प्रधानाध्यापक ध्रुवलाल श्रेष्ठ, नेपाल पत्रकार महासंघ सिन्धुपाल्चोकका अधयक्ष जीवन श्रेष्ठ, नेवाः मिसा दबू बागमति प्रदेश सदस्य शोभा उलक, नेवाः मिसा दबू सिन्धुपाल्चोक अध्यक्ष सीतादेवी श्रेष्ठ, राष्ट्रिय आदिवासी जनजाती महिला महासंघ चौ साँगाचोकगढी नरपालिकाकी अध्यक्ष शान्ति तामाङ लगायतले संस्कृतिको संरक्षणका लागि स्थानीय सरकारले चासोका साथ बजेट विनियोजन गरिनुपर्नेमा जोड दिएका थिए ।

नेवारी संस्कार, संस्कृति र परम्परागत क्रियाकलापमा नभई नहुने परिकारहरुको तालिमले नयाँ पुस्तालाई आफ्नो परम्परागत सीप जगेर्नाका लागि जागरुक बनाएको उनको तालिममा सहभागिभएकाहुले बताए । चामलको पिठोबाट विशेष प्रकारको आकारमा बनाईएको यमरी, चटामरी, समेवजी लगायत मासुको छैला, कचेला, भुटेको, साँधेको, पकाएको परिकारबारे तालिम दिइएको नेवाः मिसा दबूकी केन्द्रिय सदस्य रिना श्रेष्ठले बताईन ।

समापन समारोहमा आएमा अतिथिहरुलाई तालिममा बनाईएका नेवारी परिकार खुवाईएको थियो । नेवाः मिसा दबू चौतारा साँगाचोकगढी नगरपालिको आयोजनामा भएको सो तालिम सञ्चालन गर्न चौतारा साँगाचोकगढी नगरपालिका वडा नं. ५ ले ५० हजार रुपैंया सहयोग गरेको थियो ।