युवाहरुले सडकमै रोपे धान ! (भीडियो रिपोर्ट)

अत्तरपूर । सडकको स्तरोन्नतीमा ठेकेदार पक्ष र स्थानीय सरकारले ध्यान नदिएको भन्दै बिरोध स्वरुप लिसंखुपाखर गाउँपालिकाको अत्तरपुरका युवाहरुले सडकमै धान रोपेका छन् ।

लिसंखुपाखर गाउँपालिकाको २१ किलोदेखि अत्तरपुरको गुञ्जा डाँडासम्मको ५ किलोमिटर सडक खण्ड चौडा गर्ने र ग्राबेल गर्ने काम पाएको निर्माण कम्पनी तथा सम्बन्धीत निकायले बर्खाको बेला कुनै चासो नदिएकोले बिरोध स्वरुप धान रोपाई गरेको युवाहरुले बताएका छन् ।
सडकको स्तरोन्नति नहुँदा सो सडक खण्डमा सर्वसाधारणहरु आवत जावत गर्न निकै कठिन देखिएको छ । स्थानीय अन्दरबुङ युवा क्लव, सिद्वार्थ युवा क्लव, घ्याङडाँडा युवा क्लव र दोभान युवा क्लबले सामूहिक रुपमा सडकमा धान रोपाई गरेको सिद्धार्थ युवा क्लबका अध्यक्ष दावा छिरिङ लामाले जानकरी दिए ।

‘हामी युवाहरुले सडकको यो विजोक परिस्थितिलाई छिटोभन्दा छिटो सहज बनाउनका निमित्त पहिलो चरणको ध्यानाकर्षण गराउन चाहन्छौँ’, लामाले भने– ‘यदि हामी युवाहरु तथा सर्वसाधारणको यो मागलाई ध्यान नदिएको खण्डमा हाम्रै प्रयासमा सडक छेउमा रहेको ग्राबेल हाल्ने निर्णय गरेका छौँ ।’

सडक स्तरोन्नतीमा ढिलासुस्ती गरिँदा बिरामी ओसारपसार गर्न असहज हुनुको साथै सार्वजनिक यातायात समेत सूचारु हुन नसकेको स्थानीयको भनाई छ । स्थानीय सरकारले तत्काल समस्या हलको लागि प्रयत्न गरिनुपर्ने समेत उनीहरुको भनाई छ ।

हेर्नुस् भिडियोः