भोल्टेज कम आउँदा बिग्रिए विद्युतीय उपकरणहरु

चौतारा । एक महिना अघिदेखि सिन्धुपाल्चोकको सदरमुकाम चौतारा र आसपासको क्षेत्रमा कम भोल्टेजको विद्युत प्रवाह गरिदा स्थानीय मर्कामा परेका छन् ।

नेपाल विद्युत प्राधिकरण सिन्धुपाल्चोक वितरण केन्द्र लामोसाँघुबाट २२० भोल्ट विद्युत प्रसारण हुनुपर्नेमा चौतारा साँगाचोकगढी नगरपालिका भर १४० भोल्ट भन्दा कम मात्र प्रसारण भएको छ । जसको कारण फ्रिज, पानी तान्ने मोटर, मिल, कम्प्युटरजस्ता विद्युतीय उपकरणहरु विग्रिएको स्थानीयहरुले बताएका छन् ।

‘कम भोल्टेजको विद्युत आउँदा विद्युतीय उपकरणहरु त बिग्रिका छन्, मोवाईलजस्ता अत्यावस्यक उपकरण चार्ज गर्न समेत समस्या देखिएको छ’, विद्यार्थी नेता समेत रहेका चौतारा साँगाचोकगढी नगरपालिका– ३ का मिलन लामाले भने– ‘अझ लिफ्टबाट खानेपानीको पूर्ति हुँदै आएका ठाउँमा बत्तिकै कारण लिफ्ट नचल्दा सिंगो गाउँले नै पानी खान नपाईरहेको अवस्था छ ।’ विद्युतीय समस्यालाई तत्काल समाधान गर्न समेत उनले प्राधिकरणलाई अनुरोध गरे ।

विद्युत प्रवाहलाई व्यवस्थित बनाउने भन्दै चौतारा साँगाचोकगढी नगरपालिका– ४ देउरालीमा गत बैसाख २१ गतेबाट ट्रान्सफर्मर राखी सञ्चालनमा ल्याईएको भएपनि असार ३ गतेबाट सो ट्रान्सफर्मर बन्द छ । आवश्यक ब्याट्री नभएका कारण ट्रान्सफर्मर सञ्चालन गर्न नसकिएको कर्मचारीहरु बताउँछन् । सो ट्रान्सफर्मर सञ्चालनमा आउन सके पनि केहि हदसम्म विद्युत समस्या समाधान हुन सक्ने चौतारा साँगाचोकगढी नगरपालिका– ५ का स्थानीय कुमार श्रेष्ठले बताए ।

यता नेपाल विद्युत् प्राधिकरण सिन्धुपाल्चोक वितरण केन्द्रका इलेक्ट्रिक इन्जिनियर राजन भण्डारीले असार १ को बाढी पहिरोका कारण मेलम्चीक्षेत्रको सवस्टेशन प्रभावित बन्न पुगेका कारण सो क्षेत्रमा विद्युत प्रवाह गर्नुपर्दा विद्युतीय भार बढी पर्न गएको बताए । ‘हामीले यो समस्याको बारेमा माख्लो निकायमा कुरा गरिसकेका छौं’, उनले भने– ‘तत्काल यो समस्याको सम्बोधन होला भन्ने आशामा छौं ।’

चौतारा र आसपासका स्थानीयबाट बत्तिका कारण विद्युतीय उपकरणहरु सञ्चालन गर्न समस्या भएको गुनासोहरु आईरहेको बताउँदै शनिबार साँझसम्ममा २ सय बढी भोल्टेज पठाउने तयारी भएको बताए । ‘मेलम्चीको प्रशारण कटाएर भएपनि चौतारामा पूरा बत्ति आपूर्ति गर्ने योजना छ’, उनले भने । उनले शनिबार बिहान यसो भने पनि त्यसपछि झन् बत्तिनै आउन छाडेको स्थानीयको भनाई छ ।

‘विद्युत पूरा नआउँदा फ्रिज लगायतका विद्युतीय उपकरण चलाउन पाईएको छैन’, चौतारामा होटल व्यवसाय सञ्चालन गर्दै आएका व्यवसायी किशोर पुरी भन्छन्– ‘बत्तिका कारण हाम्रो व्यवसायनै धरापमा परिरहेको छ, सामानहरु पनि बिग्रिका छन् ।’ प्राधिकरणले तत्काल पूरा विद्युत आपूर्तिको व्यवस्था नमिलाए प्राधिकरण बिरुद्ध आफूहरु आन्दोलन गर्न बाध्य हुने उनले बताए ।

स्थानीय जनप्रतिनिधिहरुले विद्युतजस्तो सम्वेदनशील विषयमा चासो नराख्दा आफूहरु मर्कामा पर्नुपरेको स्थानीयहरुको भनाई छ ।