कसजूलाई ‘जनमत–जनक प्रधान सेवा सम्मान’ प्रदान गरिने

चौतारा । आफ्नो जीवन खण्डको ३२ वर्ष साहित्य र पत्रकारिता क्षेत्रमा लगानी गरेका सिन्धुपाल्चोकका वरिष्ट साहित्यकार एवम् पत्रकार सुरेश कसजूलाई जनमत–जनक प्रधान सेवा सम्मान– २०७७ प्रदान गरिने भएको छ ।

जनमत वाङ्मय प्रतिष्ठानद्वारा हरेक वर्ष प्रदान गरिँदै आएको सो सम्मान कसजूलाई प्रदान गर्ने निर्णय गरिएको जनमतद्वारा जारी घोषणा पत्रमा भनिएको छ । जनमत प्रकाशनको ३८औं वार्षिकोत्सवका अवसरमा काभ्रेको बनेपामा आयोजना हुने कार्यक्रममा सम्मान प्रदान गरिने जनाईएको छ ।

बि.सं. २०२९ साल असार ८ गते सिन्धुपाल्चोकको चौतारामा जम्मिएका कसजूले २०४७ को सुरुवातमै ‘जुगल वार्षिक साहित्यिक संकलन’ प्रकाशन गरी साहित्य र पत्रकारितामा क्षेत्रमा पाईला चालेका थिए । त्यस्तै २०४७ मै कसजूको अगुवाईमा सिन्धु जमर्को त्रैमासिक प्रकाशन शुभारम्भ भएको थियो ।

‘त्यतिबेलासम्म सिन्धुको साहित्य र साहित्यिक पत्रकारिता संस्थागत हुन सकेको थिएन’, कसजू विगत सम्झदै ग्लोबलपाटीसँग भने– ‘साहित्यप्रतिको लगाव र लहडका कारणमात्रै पत्रिकाहरु प्रकाशन हुन्थे, जसका कारण प्रकाशन हुने र बन्द हुने क्रम चलिरहेको थियो ।’ २०४७ दुःखी प्रकाशनको स्थापना गरी साहित्य र पत्रकारिताको संस्थागत विकासमा जुटेका कसजूले नागरिकको चेतनामा परिवर्तन ल्याउन नाटक प्रदर्शन, सिर्जना वाचन, छलफलजस्ता कार्यलाई अगाडि बढाउँदै लगे ।

‘त्यो समय अहिलेजस्तो वाकस्वन्त्रताको अवस्था थिएन । लेख्न र बोल्न निक्कै कठिन थियो’, उनले भने– ‘भेला, सम्मेलन, छलफल गर्नसक्ने अवस्था थिएन । तै पनि हामीले साहित्यिक गतिविधिहरुलाई निरन्तरता दिईरहयौं ।’ सो संस्थाले २०४८ मा ‘विप्लव’ नामक पत्रिका प्रकाशन गरेको पाईन्छ । २०५० भन्दा अगाडि मात्रै दुःखी प्रकाशनले विभिन्न स्रष्टाका ९ वटा कृतिहरु प्रकाशन गरिसकेको थियो । २०५१ को फागुन १५ मा जिल्लामै पहिलो पटक बृहत् सिन्धु साहित्य सम्मेलन गरेको कसजूको अगुवाईमा स्थापना भएको दुःखी प्रकाशनले सुप्रशिद्ध गायक प्रेमध्वज प्रधानलाई अभिनन्दन गरेको थियो । त्यस्तै २०७७ असार ६ गते प्रकाशनले दोस्रो बृहत् सिन्धु साहित्य सम्मेलन गरी ६ स्रष्टा/पत्रकारलाई सम्मान गरेको थियो ।

२०४७ सालबाट जुगल साहित्यिक पत्रिकाबाट पत्रकारिताको सुरुवात गरेको कसजूले अहिलेसम्मको १ दर्जन पत्रिपत्रिकामा संलग्न भई काम गरेका छन् । ‘सुरुवातमै जनमत, जमघट, जनआस्थाजस्ता पत्रिकामा संलग्न भएर आफ्नो क्षमता बढाउने अवसर प्राप्त भयो,’ उनले भने ।

२०६८ जेठ १७ गते गोरखापत्र संस्थानको बोर्ड सदस्यमा नियुक्त भएका कसजूले हाल सर्वपक्ष दैनिक, सिन्धु सन्देश साप्ताहिक र जुगलखबर डटकम सञ्चालन गरिरहेका छन् । त्यस्तै सिन्धु कला मन्दिर, शब्द सारथिजस्ता कला, साहित्यको क्षेत्रमा काम गर्दै आईरहेको संस्थामा सल्लाकारको भूमिकामा छन् ।

कसजूसँगै जनमतले २०७७ सालको दीपा–जनमत सम्मान भगवती अर्याल पाण्डे (नवलपुर) लाई, गणेश खिलकुमारी दुवाल–जनमत सम्मान श्रीओम श्रेष्ठ ‘रोदन’ (ललितपुर) लाई, हृदयचन्द्र–जनमत वरिष्ठ साधक सम्मान रामकुमार पाँडे(ललितपुर) लाई प्रदान गर्ने निर्णय गरेको छ त्यस्तै केवलपुरे–जनमत सम्मान सुमित्रा सुमी (रसुवा) लाई, जनमत–महेन्द्रलाल कलाकार सम्मान विक्रम श्री (इटहरी) लाई, कमला सैंजू–जनमत सम्मान डा. गीता त्रिपाठी (काभ्रे) लाई, जनमत–राजभाई सहयात्री सम्मान दिलसुन्दर श्रेष्ठ (काभ्रे)लाई, भारती–जनमत साहित्यिक पत्रकारिता सम्मान–सीता राई थुलुङ (खोटाङ) लाई प्रदान गरिने जनाएको छ ।

जनमत–केदार सुदर्शना बालसाहित्य सम्मान– अनन्त प्रसाद वाग्ले (काभ्रे)लाई, जनमत–सिचिधर्म संस्कृति सम्मान– शिला पन्त (काठमाडौं) लाई, जनमत–मित्र अनुवाद राष्ट्रिय सम्मान– कृष्ण प्रकाश श्रेष्ठ (काठमाडौं–मरणोपरान्त) लाई तथा जनमत–दीपक वैद्य स्वास्थ्य सम्मान– डा. रविन्द्र समीर पाण्डे (गुल्मी)लाई प्रदान गरिने जनाईएको छ ।