ग्लोबलपाटीका गौरवमय एक वर्ष

आज ग्लोबलपाटी दोस्रो वर्षमा प्रवेश गरेको छ । ग्लोबलपाटी ले संवैधानिक सर्वोच्चता, सुशासन, पारदर्शिता, लोकतन्त्र, वाक स्वतन्त्रता र मानवअधिकारलाई आधारभूत मार्गदर्शन मानेको छ । यसै अनुसार हामीले समाचार र विचार प्रवाह गर्दै आएका छौँ । ग्लोबलपाटी सधैँ यही मूल्यमान्यतामा अडिग रहनेछ ।

हाम्रा लागि विश्वसनीयता अर्को ठूलो मन्त्र हो । हामी ग्लोबलपाटीमार्फत प्रकाशन र प्रसारण हुने सबै किसिमका सूचनाहरूको विश्वसनीयताप्रति सधैँ सजग छौँ । हामीले छोटो समयमै हाम्रो वेबसाइटमा ठूलो संख्यामा पाठकहरू पाएका छौँ । यसबाट हामी गौरवान्वित भएका छौँ । हामी सिक्ने क्रममा छौँ । हाम्रा सामग्रीहरू पूर्णरूपमा त्रुटिरहित थिए भन्ने हाम्रो दाबी छैन । पाठकहरूले औँल्याउने त्रुटि र पाठकहरूको प्रतिक्रियाको हामी सधैँ स्वागत गर्दछौँ र सुझावअनुसार थप परिष्कृत गर्दै जानेछौँ । मूल्याङ्कन पाठकहरूकै जिम्मामा हुनेछ ।
हामी हाम्रो मार्गदर्शन, पत्रकारिताका प्रचलित मूल्यमान्यता र कानूनी दायरामा सधैँ सजग छौँ । आधुनिक प्रविधिले ल्याएको सुविधाको अधिकतम उपयोग गर्दै पाठकहरूसमक्ष पुग्नेछौँ ।

सञ्चालनको पहिलो वर्षमा सबै सञ्चार माध्यमझैँ ग्लोबलपाटी पनि विश्वव्यापी महामारीका रूपमा फैलिएको कोभिड– १९ को मारमा पर्यो। महामारीको भयका बीच पनि हामीले समाचार र विचार प्रवाहमा अधिकतम प्रयत्न गर्यौं। आमनागरिकलाई कोभिड– १९ को रोकथाम र सुरक्षा चेतनाका बारेमा सचेत गराउने उद्देश्यले समाचार, विचार र आलेखहरूलाई प्राथमिकता दियौँ । आमनागरिकको सुविधाको लागि राज्यका निकायहरूलाई सजग गराउनमा जोड दियौँ ।

अनलाइन माध्यमबाट पाठक र श्रोतासमक्ष पुर्याउन सकिने समाचार र विचारका सबै सामग्री प्रस्तुत गर्न हामी प्रयासरत छौँ । हाम्रा अनुभवका आधारमा आगामी दिनमा ग्लोबलपाटीलाई अझ परिष्कृत बनाउँदै जाने हाम्रो प्रयास जारी रहनेछ । अनलाइन सञ्चार माध्यम कुनै खास भौगोलिक क्षेत्रमा मात्र सीमित छैन । प्रविधिले हामीलाई विश्वव्यापी बनाएको छ । हामीले सोहीअनुसार राष्ट्रिय/अन्तर्राष्ट्रिय प्रमुख घटनाका समाचार सामग्री प्रस्तुत गर्दै आएका छौँ । समाचारमा हाम्रा छिमेकी र मित्र राष्ट्रहरूलाई प्राथमिकतामा राखेका छौँ । यस क्रममा मातृभूमि नेपालको हित प्रवर्द्धन हाम्रो मूल ध्येय रहेको छ ।

विविधि समाचार, विचार र मानवीय चासोका विषयहरू पाठकको रुचिअनुसार पठनीय बनाउन हामी सधैँ प्रतिबद्ध छौँ । हामीलाई राज्यको कानून र पत्रकारिताका विश्वव्यापी मूल्यमान्यता परिपालनाबाहेक कुनै पनि दबाब स्वीकार्य छैन । हामीले ग्लोबलपाटीको गौरवमय पहिलो वर्ष पूरा गरेका छौँ । पहिलो वार्षिकोत्सवका अवसरमा हामी हाम्रा समस्त पाठक, प्रबुद्ध लेखक, विज्ञापनदाता र शुभेच्छुकहरूप्रति हार्दिक कृतज्ञता ज्ञापन गर्दछौँ ।