सातकन्या माविमा ‘एक शिक्षक, एक ल्यापटप’

मेलम्ची । मेलम्ची नगरपालिका– ९ रातमाटामा रहेको सातकन्या माध्यामिक विद्यालयका सम्पूर्ण शिक्षकहरुलाई ल्यापटप हस्तान्तरण गरिएको छ ।

राष्ट्रपति शैक्षिक सुधार कार्यक्रम अन्तर्गत विद्यालयलाई आर्थिक बर्ष ०७७/७८ मा विनियोजन भएको ६ लाख ५० हजार रुपैंया बजेटबाट शिक्षकहरुलाई ल्यापटक प्रदान गरिएको हो ।

विनियोजित रकमबाट विद्यालयमा अध्यापन गराउने प्रति शिक्षकलाई ७० प्रतिशत र शिक्षकको तर्फबाट ३० प्रतिशत बेहोर्ने गरी १४ जना शिक्षकहरुलाई एक–एक थान ल्यापटप हस्तान्तरण गरिएको विद्यालयका प्रध्यानाध्यापक जनक अधिकारीले जानकारी दिए । शुक्रबार एक कार्यक्रमबीच ९ नम्बर वडाका वडा अध्यक्ष कमलबहादुर खड्काले शिक्षकहरुलाई उक्त ल्यापटप हस्तान्तरण गरेका हुन् ।

ल्यापटप वितरण गर्दै अध्यक्ष खड्काले सामग्री पाउनुमात्रै उपलब्धि नरहेको भन्दै यसको सहि सदुपयोग गरेर विद्यार्थीलाई गुणस्तरीय शिक्षा दिन सहयोग पुर्याउनुपर्ने बताए । ‘यस विषयमा तपाईहरुको दक्षता, क्षमता र योग्यताले भ्याएसम्म अधिकतम प्रयोग गरेर सम्पूर्ण विद्यालयको शैक्षिक अवस्था उकास्न सफल हुनुहुनेछ भन्ने विश्वास लिएको छु,’ अध्यक्ष खड्काले भने । अब विद्यालयले शैक्षिक अवस्थाको सुधारमा मूख्य जोड दिनुपर्ने उनले बताए ।

प्रविधितर्फ उन्मुख भैरहेको समाज र विद्यार्थीहरुलाई अध्यापन गर्न अहिले चक डस्टर र मार्कर प्रयोग गरी कक्षाकोठामा शिक्षकले अध्यापन गराउने कार्य परम्परागत र झन्झटिलो बन्दै गइरहेकोले अबको कक्षा शिक्षण ‘स्मार्ट बोर्ड’, प्रत्येक कक्षाकोठामा श्रब्य दृश्य माध्यमको प्रयोग गरि सबै शिक्षकहरुलाई सोको तयारीका लागि आवस्यक प्रशिक्षण दिई आगामी एक वर्ष भित्र प्रविधीमैत्री शिक्षण सिकाई सञ्चालन गरिने प्रधानाध्यापकअधिकारीले बताए।