एमसीसीले अधिग्रहण गरेको जमिन कब्जा

नुवाकोट । नुवाकोटको बेलकोटगढी नगरपालिका– ७ रातमाटेमा एमसीसीका लागि एमसीए नेपालले अधिग्रहण गरेको करिब चार सय रोपनी जमिन कब्जा गरिएको छ ।

संरचना निर्माण गरिन लागिएको स्थलमा राष्ट्रिय अभियान नेपाल, उन्नत लोकतन्त्र पार्टी(एडिपि) ले शनिबार हजारौंको संख्यामा प्रदर्शन गर्दै राष्ट्रिय झण्डा गाडेर सो जग्गा कब्जाको घोषणा गरेको हो । सो जग्गामा एमसीसीले कुनै पनि संरचना निर्माण गरेमा ध्वस्त गर्ने चेतावनी उनीहरुले दिएका छन् ।

जुलुससहित सो क्षेत्रमा पुगेका नेता कार्यकर्ताहरुले एमसिसी चाहिँदैन, विदेशी हस्तक्षेप मुर्दावाद, आमन्त्रित हस्तक्षेप मुर्दावादजस्ता नारा लगाएका थिए । एमसिसीले अधिग्रहण गरेको जग्गामा झण्डा गाड्दै उन्नत लोकतन्त्र पार्टीका अध्यक्ष तथा अधिवक्ता स्वागत नेपालले सो स्थानमा उप्रान्त एमसिसीको कुनै पनि संरचना निर्माण गरिएमा तत्काल ध्वस्त बनाइने चेतावनी दिए ।

उनले अधिग्रहण गरिएका व्यक्तिहरुलाई प्रलोभन, झुक्यान र डर धाकधम्की दिएर एमसिसी पक्षधर नेता र प्रशासकहरुले जमिन अधिग्रहण गरेको कारण उक्त स्थानमा राष्ट्रिय कृषि विश्वविद्यालय, अनुसन्धानशाला वा खेलकुद रंगशाला निर्माण गरिनु पर्ने पनि बताए । सो स्थानमा प्रतिकारका लागि पाँच सय सदस्यीय एमसिसी प्रतिकार समिति पनि गठन गरेको घोषणा गरिएको थियो ।

जग्गा कब्जा घोषणा सभामा उन्नत लोकतन्त्र पार्टीका केन्द्रीय सदस्यहरु कृष्ण प्रसाई, राम राजा आचार्य, शिवराम थापा, दुर्गा बस्नेत, नरेन्द्र कुमार शाह, विद्यार्थी संगठनका अध्यक्ष केके थापा लगायतले एमसिसी नेपालको संविधानभन्दा माथि भई नेपाललाई कानुनी रुपमा अमेरिकी उपनिवेस बनाउने चाल भएकोले निस्तेज बनाउन आफूले जुनसुकै मुल्य चुकाउन तयार रहेको बताएका थिए ।