चौतारा स्पोर्टिङ क्लवलाई बचत समूहद्वारा सहयोग

चौतारा । चौतारा स्पोर्टिङ क्लवलाई चौतारा युवा बचत समूहद्वाले सहयोग गरेको छ । समूहले क्लबलाई ११ हजार १ सय ११ रुपैंया सहयोग गरेको हो ।

अखिल नेपाल फुटबल संघ (एन्फा) द्वारा यहि भदौ १० गतेदेखि आयोजना हुने शहिद स्मारक सि डिभिजन लिग फुटबल छनौट प्रतियोगिता २०७८ मा चौतारा स्पोर्टिङ क्लव सहभागि भई क्वालीफायर खेल्ने छ ।

सिन्धुपाल्चोक जिल्लाकै खेलकुद इतिहासमा पहिलो पटक शहिद स्मारक सि डिभिजन लिग फुटबल छनौट प्रतियोगितामा सहभागिता जनाई जिल्लाको खेलकुद गतिविधि र युवा खेलाडीहरुलाई नयाँ दिशा दिन क्लब अग्रसर भएको भन्दै समूहले खेल क्षेत्रको विकासको लागि सहयोग गरेको जनाएको छ ।

चौतारा स्पोटिङ क्लव सिन्धुपाल्चोक जिल्लाबाट सी डिभिजन क्वालीफायर खेल्ने पहिलो क्लव हुनेछ । सिन्धुपाल्चोकको कुनैपनि क्लवले हालसम्म क्वालीफायरमा प्रतिनिधित्व गरेको छैनन् । वि.सं. २०७० सालमा स्थापना भएको क्लवले २०७४ सालको सिन्धुपाल्चोक जिल्ला लिगको उपाधि समेत जितेको थियो ।

स्थानीय खेलाडी सम्मेलित चौतारा स्पोर्टिङले जिल्लाका अन्य प्रतियोगितामा दावेदारी प्रस्तुत गर्दै आएको छ । फुटबलको विकासको लागि तत्पर रहेको क्लवले राष्ट्रिय स्तरको खेलाडीपनि उत्पादन गर्दै आएको क्लबका प्रमुख सविन श्रेष्ठले बताए ।

‘डिभिजन लिग खेल्नको लागि खेल क्षेत्रलाई माया गर्ने थुप्रै संघ संस्था र महानुभावहरुले सहयोग गरिरहनु भएको छ’, श्रेष्ठले भने । उनले सिन्धुपाल्चोक जिल्लाको खेलकुद क्षेत्रको विकासको लागि सबैले हातेमालो गर्दै आ–आफ्नो क्षेत्रबाट सकेको सहयोग प्रदान गरिदिन समेत अपिल गरे ।