बागमतीमा मूख्यमन्त्रीका लागि दुई दलको दाबी

हटौंडा । नेकपा विभाजनसँगै बागमती प्रदेश सरकार अल्पमतमा परेको छ भने विपक्षी गठबन्धनले नयाँ सरकार गठनका लागि छलफल थालेका छन् ।

बागमती प्रदेश सरकारको नेतृत्वमा मुख्य रुपमा नेपाली काँग्रेस र नेकपा एकीकृत समाजवादी पार्टीले दाबी गरेका छन् । बागमती प्रदेशको मुख्यमन्त्रीका लागि नेपाली काँग्रेसको तर्फबाट संसदीय दलका नेता इन्द्रबहादुर बानियाँ, नेकपा एकीकृत समाजवादी पार्टीका नेता राजेन्द्र पाण्डेले दाबी गरेका छन् । प्रदेश सरकारको नेतृत्व कसले गर्ने भन्नेबारे गठबन्धनबीच ठोस सहमति हुन बाँकी छ । यसका लागि केन्द्रमै छलफल हुने र दलहरुबीच समझदारी बन्ने नेताहरु बताउँछन् । यद्यपि प्रदेश तहमा हाल तीनवटा दलले मुख्यमन्त्रीका लागि दाबी गरेका हुन् ।

प्रदेशसभाको अंक गणित यस्तो छ

बागमती प्रदेशमा हाल कायम रहेका १०९ जना सांसदमध्ये नेकपा एमालेका ५६ सांसद थिए । एमाले विभाजनपछि १२ सांसदले नेकपा एकीकृत समाजवादीका पक्षमा सनाखत गराइसकेका छन् । अब एमालेमा ४४ सांसदमात्र छन् ।

प्रदेशसभामा नेकपा माओवादी केन्द्रका २३ जना, नेपाली काँग्रेसका २२ जना, विवेकशील साझाका ३ जना, राप्रपा र नेमकिपाका २÷२ जना र एक स्वतन्त्र सांसद् छन् । प्रदेश सरकार गठनका लागि ५५ जना सांसदको समर्थन आवश्यक हुन्छ । मुख्यमन्त्री अष्टलक्ष्मी शाक्यले बहुमत जुटाउन थप ११ सांसदको समर्थन खोज्नुपर्ने हुन्छ । तर अहिलेको समीकरणमा उनले बहुमतको आँकडा छुन सक्ने सम्भावना देखिएको छैन ।
गठबन्धनका तर्फबाट माओवादी, काँग्रेस र एकीकृत समाजवादी मिल्दा सहजै बहुमत पुग्ने देखिन्छ । एकीकृत समाजवादीका १२, माओवादीका २३ र काँग्रेसका २२ गरी ५७ सांसदका साथ गठबन्धनले प्रदेश सरकार गठन गर्न सक्ने अवस्था छ ।

भदौ २ गते अष्टलक्ष्मी शाक्य मुख्यमन्त्री नियुक्त भएकी हुन् । लामो समय माधवकुमार नेपाल पक्षमा खुलेकी उनी पार्टी विभाजन हुने अवस्थामा एमालेमै सामेल भएर सरकारको नेतृत्व सम्हाल्ने अवसर प्राप्त गरिन् । तर पार्टी विभाजनपछि एमाले छाडेर नेकपा एकीकृत समाजवादी पार्टीमा १२ सांसद सामेल भएपछि भने एमाले अल्पमतमा परेको हो ।