बित्तिय संस्थाका प्रमुखहरुले गरे क्लब गठन

चौतारा । सिन्धुपाल्चोकको सदरमुकाम चौतारामा रहेका बित्तिय संस्थाका प्रमुखहरुले क्लब गठन गरेका छन् ।

बैंकहरु, जीवन बिमा कम्पनीहरु र माइक्रोफाइनान्सहरुमा आबद्ध शाखा प्रबन्धकहरुको भेलाले ‘बैंक इन्स्योरेन्स माइक्रोफाइनान्स क्लब’ गठन गरेको हो । नेपाल बैंकका शाखा प्रबन्धक समिककुमार दाहालको अध्यक्षतामा ७ जनाको कार्यसमिती गठन गरिएको छ । त्यस्तै उपसमितिमा लक्ष्मी बैंकका शाखा प्रबन्धक पवन सापकोटाको संयोजकत्वमा ५ जना सदस्यीय समिति गठन गरिएको हो ।

चौतारा क्षेत्रमा आर्थिक कारोबार गर्ने बित्तिय सस्थाहरुको प्रमुखहरुबीच समन्वय, विचारहरु आदानप्रदान गरि काम गर्न र सामाजिक कार्य गर्नका लागि क्लब गठन गर्न आवश्यक रहेको बैठकमा उपस्थित शाखा प्रबन्धकहरुले बताए । चौतारा क्षेत्रमा हाल नेपाल बैंक लिमिटेड, ग्लोबल आइएमी बैंक, मेगा बैंक, कृषि बिकास बैंक, एनसिसि बैंक, लक्ष्मी बैंक र सिन्धु बिकास बैंकले सेवा दिईरहेका छन् त्यस्तै रिलायबल नेपाल लाइफ, युनियन लाइफ, ज्योति लाइफ, सानिमा लाइफ, रिलायन्स लाइफ, प्राइम लाइफ गरि ६ वटा विमासंस्था र एक निर्जीवन बिमा कम्पनी हिमालयन जनरल इन्स्योरेन्स रहेको छ ।

त्यस्तै छिमेक, स्वाबालम्बन, एनएमबि, सिभिल, सामुदायिक, ग्लोबल, मानुषी र नेपाल सेवा माइक्रोफाइनान्स गरी ८ वटा लघुबित्तहरु सञ्चालनमा छन् । हाल चौतारामा सहकारीहरु बाहेक २२ वटा बित्तिय संस्थाहरु सञ्चालनमा रहेको क्लबका अध्यक्ष दाहालले बताए । चौतारामा रहेका सबै वित्तिय संस्थाका शाखा प्रमुखहरुलाई क्लबमा सहभागिता गराई सामाजिक एवम् हकहितका कार्यलाई अगाडी बढाउने उनले बताए ।