प्रेस काउन्सिलले सिन्धुका तीन पत्रकार पुरस्कृत गर्ने

चौतारा । प्रेस काउन्सिल नेपालले वार्षिकोत्सवका अवसरमा प्रदान गर्दै आएको विभिन्न पुरस्कारहरू र पुरस्कृत हुने पत्रकारको नाम सार्वजनिक गरेको छ ।

काउन्सिलले बुधबार एक विज्ञप्ति जारी गर्दै यस बर्ष पुरस्कृत हुने पत्रकारहरुको नाम सार्वजनिक गरेको छ । यसपटक सिन्धुपाल्चोकबाट तीनजना पत्रकार पुरस्कृत हुने भएका छन् । प्रेस काउन्सिल क्रियाशील पत्रकारिता पुरस्कारबाट माधव नेपाल र बासुदेव शर्मा ‘बबिन’ पुरस्कृत हुने भएका हुन् । त्यस्तै प्रेस काउन्सिल युवा पत्रकारिता पुरस्कार जगन्नाथ दुलाललाई प्रदान गर्ने निर्णय काउन्सिलका अध्यक्ष बालकृष्ण बस्नेतको अध्यक्षतामा बसेको बैठकले गरेको छ ।

पुरस्कृत सिन्धुपाल्चोकका तीन मध्ये माधव नेपाल र जगन्नाथ दुलाल नेपाल पत्रकार महासंघ सिन्धुपाल्चोकका सदस्य समेत हुन् । २२ वर्षदेखि मोफसल हुँदै केन्द्रीय सञ्चारमाध्यममा समेत काम गरेका माधव नेपाल गएको चैत्र २५ मा भएको नेपाल पत्रकार महासंघको निर्वाचनमा बरिष्ठ उपाध्यक्षको उम्मेदवार समेत बनेका थिए । दुलाल भने हाल न्यूज २४ मा रिपोर्टिङ इञ्चार्जको रुपमा कार्यरत छन् । त्यस्तै पुरस्कृत हुने शर्मा समाचार दैनिक अनलाईनका सम्पादक हुन् ।

काउन्सिलले यस वर्ष ३२ जना पत्रकार, २ सञ्चार संस्था र ४ जना कर्मचारीलाई पुरस्कृत गर्ने निर्णय गरेको छ । काउन्सिलले प्रदान गर्दै आएको सबैभन्दा ठूलो मानिने ‘गोपालदास पत्रकारिता पुरस्कार’ यस वर्ष वरिष्ठ पत्रकार भारतदत्त कोइराला र ‘सुरेन्द्रबहादुर बस्नेत पत्रकारिता पुरस्कार’ वरिष्ठ पत्रकार बद्रीविनोद खनाल ‘प्रतीक’, लाई प्रदान गर्ने निर्णय गरेको हो ।

प्रेस काउन्सिल नेपालका पूर्व अध्यक्ष एवं पत्रकारिता क्षेत्रका मूर्धन्य व्यक्तित्व स्व. गोपालदास श्रेष्ठको नाममा स्थापित रू. एक लाख ५१ हजार राशिको गोपालदास पत्रकारिता पुरस्कार तथा प्रेस काउन्सिल नेपालका संस्थापक अध्यक्ष सुरेन्द्रबहादुर बस्नेतको नाममा वि.सं. २०७२ सालमा स्थापित प्रेस काउन्सिल सुरेन्द्रबहादुर पत्रकारिता पुरस्कार २०७३ सालदेखि वरिष्ठ पत्रकारहरूलाई दिन थालिएको वरिष्ठ प्रशासकीय अधिकृत दीपक खनालद्वारा जारी विज्ञप्तिमा जनाइएको छ ।

‌‌‌