कृषकलाई ‘एक घर एक करेसाबारी’ तालिम प्रदान

चौतारा । चौतारा साँगाचोकगढी नगरपालिका– ११ पोखरेबेसीका कृषकहरुलाई ‘एक घर एक करेसाबारी’ तालिम दिईएको छ ।

सेबक नेपाल/सिमाभि आशा परियोजना सिन्धुपाल्चोकको आर्थिक तथा प्राबिधिक सहयोगमा उनीहरुलाई २ दिने घरायसी करेसाबारी प्रवद्र्धन तालिम दिईएको हो । प्रधानमन्त्री कृषि आधुनिकीकरण परियोजना इकाईका प्राविधिक सुमन खड्का र सम्झना नेपालले तालिमको सहजीकरण गरेका थिए ।

सेवक नेपालले यस अघि सिमाभिको आर्थिक सहयोगमा ३४ घरधुरिलाइ खानेपानीको सहज पहुँचको लागि खानेपानी आयोजना निर्माण गरेको थियो । खेर गएको पानीलाई सदुपयोग गर्दै एक घर एक करेसाबारी निर्माणको लागि परियोजनाले एकाघर एक सदस्यलाई दुई दिने घरायसी करेसाबारी ब्यबस्थापन तालिम प्रदान गरेको हो ।

तालिममा नर्सरी स्थापना सँगसँगै संस्थाले ३४ घरका सबै सदस्यलाई काउली, बकुल्ला, चमसुर पालुङो, गाजर, मुला, धनिया र रायोको बीउ समेत वितरण गरेको छ । अब बीउ रोपेपछि उब्जेको तरकारी घरमा प्रयोग गरेर बाँकी रहेको तरकारी दोलालघाट बजारमा लगेर बेच्ने कृषक गंगा गिरीले बताईन् । ‘अब घरखर्च चलाउनका लागि केहि भएपनि आर्थिक सहयोग हुन्छ भन्ने आशा छ’, उनले भनिन् ।

तालिम पश्चात स्थानीय कृषकहरुले खेर गएको पानीलाई प्रयोग गर्दै आ–आफ्नो घरमा विभिन्न थरिका तरकारीहरु उत्पादन गरि उपभोगको साथसाथै आ–आफ्नो घरको करेसाबारीमा उत्पादन भएको तरकारी बजारसम्म पुर्याउदै कृषकहरुले जीविकोपार्जनको लागी आर्थिक विकास हुने विश्वास लिएको कार्यक्रम संयोजक कुमार भट्टराईले बताए ।