शब्द सारथिको नियमित शृङ्खला सुरु

चौतारा । सिन्धुपाल्चोकबाट सञ्चालित साहित्यिक रचना सुन्ने सुनाउने शृंखला पुनः सुरु भएको छ ।

शुक्रबार शब्द सारथिको ९६औं शृङ्खला नेपाल पत्रकार महासंघ सिन्धुपाल्चोकको सभाहलमा सम्पन्न भएको छ । कोरोना महामारीका क्रममा रोकिएको शृङ्खला अब नियमित सञ्चालन गर्ने सारथिका अध्यक्ष अमित घिमिरेले बताए । ‘कोरोनाका कारण बीचमै स्थगित गरिएको थियो,’ उनले भने, ‘अहिले जनजीवन सामान्य अवस्थामा फर्किएकाले फेरि सुरुआत गरिएको हो ।

९६औं शृङ्खलामा साहित्यकार जिएस नेपाल, टीका शर्मा, सम्भू बैरागी, बेली विक, हरिशरण श्रेष्ठ, विजय नेपाल, सुन्दर शिरीष, अमित घिमिरेलगायतले कविता वाचन गरेका थिए । दुई दर्जन सारथि, स्रष्टा उपस्थित शृङ्खलामा विशेष स्रोता चौतारा साँगाचोकगढी नगरपालिकाका रोजगार संयोजक चिरञ्जिवी कट्टेलले साहित्यले समाजलाई सहि गन्तव्यमा पु¥याउन मद्दत गर्ने हुँदा शृङ्खलालाई निरन्तरता दिनुपर्ने बताए । सारथिका अध्यक्ष घिमिरेले समापन गरेको शृङ्खलालाई सचिव सुन्दर शिरीषले सञ्चालन गरेका थिए ।

साहित्यलाई प्रबद्र्धन गर्ने र नयाँ स्रष्टालाई प्रतिभा प्रस्फुटन गर्न थलो प्रदान गर्ने उद्देश्यले २०७५ असोज १६ बाट शब्द–सारथि सुरुवात गरिएको थियो । ६ जना साहित्यिक अभियन्ताबाट सुरु गरिएको पहिलो शृंखला हुँदै हालसम्म एक सय भन्दा बढी साहित्यिक व्यक्तिहरुले रचना सुनाइसकेका छन् । शृंखला सुरु भएपछि विभिन्न आन्दोलन, पहिचानको खोजी, समृद्धि र समुन्नत समाजकोे पक्षमा यो संस्था अनवरत रुपमा अगाडि बढेको छ ।

शब्द सारथिले गौराति भीमेश्वर मेलाको अवसरमा पर्यटनका लागि साहित्य, कञ्चनपुरमा बलात्कारपछि हत्या भएकी निर्मला पन्तको न्यायका निम्ति कविता, सिन्धु साहित्य उत्सव, पुस्तक विमोचन कार्यक्रमहरु शृंखलाकै क्रममा गरेको छ । त्यस्तै साहित्यका विविध विधालाई समेट्ने ध्येयले मुक्तक विशेष, हाइकु विशेष, बाल साहित्य विशेषजस्ता शृंखलाहरुसमेत गरेको शब्द सारथिले जनाएको छ ।

त्यस्तै २०७७ चैत्र ३० देखि २०७८ बैशाख २ गतेसम्म पोखरेली स्रष्टासँग सिन्धु स्रष्टा कार्यक्रमको आयोजना गरेको थियो । सो कार्यक्रममा पोखराका स्रष्टा र सिन्धुपाल्चोकका स्रष्टाको सहभागिता थियो । अभियानलाई कर्मचारी, जनप्रतिनिधि, समाजसेवी, बुद्धिजीवि, शिक्षक, नागरिक समाज, सञ्चारकर्मी लगायत सारथि बनेर यो अभियानलाई हौसला प्रदान गरिरहेका छन् । शृङ्खला हरेक शुक्रबार दिउँसो ३ः०० बजे नियमित सञ्चालन हुने गरेको छ ।