निषेधित क्षेत्रको माग गर्दै महिलाले बुझाए ज्ञापनपत्र

चौतारा । शिक्षण संस्था, स्वास्थ्य संस्था आसपास निश्चित दूरी कायम गरी धुमपान, मध्यपान, जुवातास निषेधित क्षेत्र घोषणा गर्नुपर्ने माग गर्दै अखिल नेपाल महिला संघ (क्रान्तिकारी) सिन्धुपाल्चोकले ज्ञापनपत्र बुझाएको छ ।

१२ सुत्रिय माग सहित महिला संघले जिल्ला प्रशाशन कार्यालय र १२ वटै स्थानीय तहमा ज्ञापनपत्र बुझएको छ । शैक्षिक संस्था हाताभित्र अखाद्यबस्तु बिक्रिवितरणमा रोक लगाउनुपर्ने, माध्यमिक तहसम्म किशोरीमैत्री वातावरण बनाउनुको साथै आराम कक्ष र सेनेटरी प्याडको प्रबन्ध गरिनुपर्ने, छोरीहरुलाई माध्यमिक तहसम्म निःशुल्क शिक्षाको व्यवस्था गर्नुपर्ने, विद्यालयमा स्टाफ नर्सको व्यवस्था गर्नुपर्नेलगायतको माग राखिएको छ ।

त्यस्तै आमाको नाममा सहज नागरिकता पाउने वातावरण निर्माण गर्नुपर्ने, पैत्रिक सम्पत्तिमा समान हक लागु गर्र्नुपर्ने, लैगिक उत्तरदायी बजेट १० प्रतिशतसम्मको व्यवस्था गरी कार्यान्वयन गर्नुपर्ने, हिंसामुक्त पालिका घोषणा गर्नुपर्ने माग महिला संघको छ ।

प्रत्येक स्थानीय तहमा आपतकालिन सुरक्षा गृह बनाउनुपर्ने, गर्भवती महिलालाई अस्पतालमै सुरक्षित सुत्केरी हुने व्यवस्था मिलाउनुपर्ने, हिंसा पीडित महिलाहरुलाई तत्काल न्यायको व्यवस्था गरिनुपर्ने माग उनीहरुको छ ।

‘महिलाको सवालमा कानुन बन्ने तर त्यसको कार्यान्वयन नहुने स्थिति भईरहेकोले ती कानुनलाई तत्काल लागु गर्न हामीले दवाव दिएका हौं’, अखिल नेपाल महिला संघ (क्रान्तिकारी) सिन्धुपाल्चोककी सचिव तारादेवी रानाले भनिन्– ‘हामीले स्थानीय तहहरु र प्रशासन कार्यालयलाई हाम्रा मागहरु तत्काल कार्यान्वयनको लागि भनेका छौं ।’