तुईन पूरा भएको छैन, गलत प्रचार नगरौं: समाज

चौतारा । हेलम्बु गाउँपालिकाकोे चनौटेमा बनेको तुईन उद्घाटन भई सञ्चालनमा आएको भन्ने सामाजिक सञ्जाल र सञ्चार माध्ययममा प्रकाशित खबरप्रति सिन्धु ईन्जिनियरिङ समाज नेपालले आफ्नो ध्यानाकार्षण भएको जनाएको छ ।

सोमबार एक प्रेस विज्ञाप्ति जारी गर्दै समाजले तुईन निर्माण पूरा नभएको र सञ्चालनमा पनि नआएको जनाएको हो । ‘सामाजिक भावनाबाट प्रेरित भई विपतको बेला गैर राजनीतिक संस्थाबाट गरिएको कामलाई कुनै व्यक्तिले गरेको भनि गरिएको प्रचारबाजी विज्ञाप्तिमार्फत खण्डन गर्दै भ्रम नफैलाउन सबैलाई अनुरोध गरिएको छ’, जारी विज्ञप्तीमा भनिएको छ ।

‘तुईन निर्माण सिन्धु ईन्जिनियरिङ समाजको अगुवाई र विभिन्न व्यक्ति र संघ संस्थाको सहयोगमा निर्माण जारी छ, यस्को लागत कति हो भन्ने पनि एकीन तथ्याङ्क उतारिसकिएको छैन’, सिन्धु ईन्जिनियरिङ समाज नेपालका सचिव ई. विदुर कँडेलले ग्लोबलपाटीसँग भने– ‘तर सामाजिक सञ्जाल र सञ्चार माध्ययममा कुनै राजनीतिक व्यक्तिको पहलमा तुईन बनेको र उद्घाटन भएको प्रकाशित भएको देखियो ।’

आईतबार बागमती प्रदेशसभाका सदस्य एवम् पूर्व सामाजिक विकास मन्त्री युवराज दुलालको सहयोगमा तुइन निर्माण भएको र तुइन माओवादी केन्द्रका जिल्ला सदस्य पेमा होल्मोले उद्घाटन गरेको खबर प्रकाशित प्रशारित भएको थियो । सो खबर तथ्यपरक नभएको समाजले जनाएको छ ।

‘तुईन निर्माण कार्य अगाडि बढाउने क्रममा मेलम्ची नदीमा पानीको बहाव बढेर जगमा असर पुगेकाले यसको निर्माणमा केहि ढिलाई भएको र तुईन निर्माण कार्य सकिनसाथ सम्पूर्ण सहयोगी हातहरुको उपस्थितिमा तुईन सञ्चालनमा ल्याई हेलम्बु गाउँपालिकालाई हस्तान्तरण गरिने छ’, विज्ञप्तिमा भनिएको छ ।

गत असार १ र श्रावण १६ गतेको बाढीले हेलम्बु गाउँपालिकाको चनौटेमा रहेको रातोपुल बगाएपछि आवतजावतमा समस्या भएको थियो । यसैक्रममा सिन्धु ईन्जिनियरिङ समाज नेपालको प्राविधिक र आर्थिक सहयोगमा उक्त स्थानमा तुईन निर्माण सुरु गरिएको थियो ।

यता सहज आवतजावतको लागि स्थानीयहरुले रातोपुलमा फट्के निर्माण गरिसकेका छन् । फट्के निर्माण भई दुई पाङ्ग्रे सवारीसाधन समेत सञ्चालन हुन सक्ने भएपछि तुईन राख्नुको अर्थ नभएको स्थानीयले बताएका छन् । ‘तुईन हाल्ने नै भए यत्ति लामो समयसम्म के हरेर बसिरहेका हुन्’, एक स्थानीयले भने– ‘खोला सानो हुँदै गएको अवस्था र हामीले दुई पाङ्ग्रे सवारीसाधनसमेत आउजाउ गर्न मिल्ने गरी फट्के बनाईसकेपछि तुईन हाल्नुको कुनै औचित्य छैन ।’