जुगलले पत्रकारका छोराछोरीलाई निःशुल्क पढाउने

चौतारा । सिन्धुपाल्चोक चौतारामा रहेको जुगल बोर्डिङ हाइस्कुलले पत्रकारका छोराछोरीलाई निःशुल्क अध्यापन गराउने घोषणा गरेको छ ।

बोर्डिङले नेपाल पत्रकार महासंघ सिन्धुपाल्चोक शाखासँगको समन्वयमा दुई जना पत्रकारका छोराछोरीलाई निःशुल्क पढाउने भएको हो । बोर्डिङका प्रिन्सिपल ओमप्रकाश उप्रेतीले मंगलबार नेपाल पत्रकार महासंघको आयोजनामा भएको विजया दशमी, दिपावली, नेपाल सम्वत्, तथा छठ पर्वको अवसरमा गरिएको शुभकामना आदानप्रदान कार्यक्रममा सो घोषणा गरेका हुन् ।

निःशुल्क अध्यापन गराउनका लागि पत्रकार महासंघले पत्रकारका छोरा या छोरीलाई सिफारिस गर्नुपर्ने गर्ने र हरेक वर्ष नवीकरण गर्ने गरि महासंघसँग सम्झौता गरिने बोर्डिङले जनाएको छ । प्रिन्सिपल उप्रतीले पत्रकार महासंघलाई बोर्डिङमा पढाउने बालबालिका सानो कक्षामा अध्ययनरतलाई पठाउन आग्रह समेत गरे । ‘हामीले कक्षा १० सम्म निःशुल्क पढाउनेछौं,’ उनले भने- ‘सानो कक्षाका बालबालिका भएपछि हामीले सेवा लामो समयसम्म दिन सक्छौं ।’ उनले ठूलो कक्षा भएमा दुई/तीन वर्ष मात्रै अध्यापन गराउन बाध्य हुने भएकाले सकेसम्म नर्सरी वा प्ले ग्रुपमा अध्ययन गर्ने बालबालिका चाहेको बताए ।

वर्षौं अघिदेखि एसएलसीमै जिल्लामै उत्कृष्ट नतिजा ल्याउने गरेको यो अभिभावकले रुचाएका बोर्डिङ स्कुल हो । बोर्डिङको यो घोषणालाई पत्रकार महासंघले स्वागतयोग्य रुपमा लिएको छ । ‘पत्रकारको सन्ततीलाई निःशुल्क अध्यापन गराउनु स्वागतयोग्य कदम हो,’ नेपाल पत्रकार महासंघ सिन्धुपाल्चोक शाखाका अध्यक्ष जीवन श्रेष्ठले भने, ‘यस कदमले सञ्चार क्षेत्रमा काम गर्ने पत्रकारहरुलाई केहि मात्रामा भएपनि सहयोग पुग्नेछ ।’