म्याद गुज्रेका अखाद्य वस्तु नष्ट

चौतारा । दसैंलगायत चाडपर्व नजिकिएसँगै सिन्धुपाल्चोकका विभिन्न बजारमा गरिएको अनुगमनबाट बरामद गरिएका विभिन्न म्याद गुज्रेका अखाद्य वस्तु नष्ट गरिएको छ ।

अनुगमन गर्दा म्याद नाघेका, म्याद नै उल्लेख नभएका खाद्य सामग्री घरेलु तथा साना उद्योग विकास समितिको प्राङ्गणमा जलाएर नष्ट गरिएको हो । जिल्ला प्रशासन कार्यालयका प्रशासकीय अधिकृत नारायण लघु सहित जिल्लाका विभिन्न कार्यलयका प्रतिनिधिहरुको उपस्थितीमा अखाद्य वस्तु जलाईएर नष्ट गरिएको थियो ।

चामल, तेल, बदाम, मैदा, बिस्कुटलगाएत विभिन्न २० प्रकारका सामग्री अनुगमनको क्रममा बरामद गरिएको घरेलु तथा साना उद्योग विकास समितिका कार्यालय प्रमुख रामशरण गौतमले बताए । ‘केही खाद्यान्नमा उत्पादन मिति नै उल्लेख नगरेको, केही म्याद गुज्रेको, केहीमा लेभल नै नलगाइएको अवस्थामा बरामद गरिएको थियो’, गौतमले भने– ‘त्यस्ता सामग्रीले उपभोक्तको स्वास्थ्यमा प्रत्यक्ष प्रतिकुल असर पार्ने भएकोले बरामदपछि नष्ट गरेका हौं ।’

अनुगमनको क्रममा ९९ प्रतिशत पसलले मूल्य सूची नराखेको पाईएको जिल्ला प्रशासन कार्यालयका प्रशासकीय अधिकृत नारायण लघुले बताए । ‘अनुगमनको क्रममा झण्डै ९९ प्रतिशत पसलहरुमा मूल्यसूची पाईएन,’ उनले भने– ‘त्यस्ता पसलहरुलाई एक साता भित्र मूल्य सूची राख्नको लागि निर्देशन दिएका छौं ।’

त्यस्तै मेलम्ची क्षेत्रमा पनि बजार अनुगमनका क्रममा भेटिएका मिति गुज्रिएको सामानहरुको जफत गरि नष्ट गरिएको छ भने पटक पटक भन्दा पनि दर्ता नगर्नेहरुको लागि कारबाहि स्वरुप जरिवाना लिइएको छ । नगरपालिकाले विगत ३ बर्षदेखि निरन्तर बजार अनुगमन गर्दै आएको छ । सुरुको चरणमा भन्दा केहि सुधार भएपनि अझै केहि समस्या कायमै रहेको मेलम्ची नगरपालिकाका राजस्व शाखाका प्रमुख राजेन्द्र दुलालले जानकारी दिए ।

अनुगमनका क्रममा विद्यालय, स्वास्थ्य चौकी र वडा कार्यालय आसपासका क्षेत्रमा खुलेआम मदिराजन्य पदार्थ विक्रि वितरण गर्ने गरेको पाइएपछि नष्ट गरिनुका साथै पत्र काटेर सचेत गराइएको दुलालले जानकारी दिए । चाडपर्वको मौका छोपी ब्यापारीहरुले मिति गुज्रेका अखाद्य सामग्री बिक्रि वितरण गर्ने गरेको पाइएपछि निरन्तर र नियमित बजार अनुगमनलाई तिव्रता दिइएको उपभोक्ता हित संरक्षण मञ्च मेलम्ची नगरपालिकाका संयोजक सालिकराम अधिकारीले जानकारी दिए ।

अनुगमनमा सम्बन्धित वडाका वडा अध्यक्ष, राजस्व शाखाका प्रमुख राजेन्द्र दुलाल, नगरपालिकाका विभिन्न शाखाका कर्मचारी बजार अनुगमन समितिका संयोजक रामबहादुर तामाङ, इलाका प्रहरी कार्यालय मेलम्ची, सशस्त्र प्रहरी बल मेलम्ची, उद्योग वाणिज्य सघं सिन्धुपाल्चोकलगायतको सहभागिता रहेको थियो ।

नगरका केहि बजारमा अनुगमन गर्न अझै बाँकी रहेको र त्यस भेगमा अनुगमनका लागि छिट्टै पुग्ने अनुगमन समितिले जनाएको छ । अनुगमनका क्रममा सचेत गराइएको पसलहरुमा फेरिपनि नियमविपरित गरेमा कारबाहि गरिने समितिले जनाएको छ । साथै सामानहरु खरिद तथा विक्रि गर्दा अनिवार्य मिति हरेर मात्र खरिदविक्रि गर्न समेत बजार अनुगमन समितिले आग्रह गरेको छ ।