कसैको दवाव र प्रभावमा निर्णय गर्दिनः सभामुख

चौतारा । प्रतिनिधिसभाका सभामुख अग्निप्रसाद सापकोटाले आफूले कहिल्यै कसैको दवाव र प्रभावमा निर्णय नगर्ने बताएका छन् ।

एमालेका १४ सांसदलाई कार्वाही नगरेको विषयमा उसले प्रतिनिधिसभा लामो समयदेखि अवरोध गरिरहेको छ । यसतर्फ संकेत गर्दै सापकोटाले आफूले कसैको दबाब र प्रभावमा निर्णय नगर्ने स्पष्ट पारे । सापकोटाले पछिल्लो पटक संसद अवरोध हटाउन विपक्षीसँग समझदारीको प्रयास भइरहेको समेत बताए । । ‘म कसैंको दवाव र प्रभावमा निर्णय गर्दिन’, उनले भने– ‘अहिले राष्ट्रिय रुपमा देखिएका केहि समस्यालाई हल गर्नेतर्फ लागिरहेको छु ।’

चौतारा साँगाचोकगढी नगरापलिकास्थित कुविण्डे दुग्ध उत्पादक सहकारी संस्थाको २९औँ वार्षिक साधारणसभाको बुधबार उद्घाटन गर्दै सभामुख सापकोटाले आफूले नेपाली जनतालाई कहिल्यै धोका नदिने बताउँदै प्रतिनिधि सभाको गरिमालाई आँच आउन नदिने जनाए । संसद अवरुद्ध हुनु राष्ट्रिय संकट भएको बताउँदै सभामुख सापकोटाले सो समस्याको समाधान गर्न समझदारीको लागि प्रयास भइरहेको बताए । ‘विपक्षीसँग विभिन्न माध्यमबाट छलफल भइरहेको छ’, उनले भने– ‘सरकारको तर्फबाट प्रधानमन्त्री र संसदको नेतृत्व सभामुखबाट संसद अवरोध हटाउने प्रयास जारी छ । वाद, बिवाद र संवादको माध्यममले यो गतिरोध हट्ने विश्वास छ ।’

सभामुख सापकोटाले एकै वर्ष दुई चोटी संसद विघटन हुनुलाई राष्ट्रिय संकटको संज्ञा दिए । विश्वमै एकै वर्ष संसद बिघटन कतै नभएको उल्लेख गर्दै उनले भने, ‘यो दुर्भाग्य नेपालमा मेरै कार्यकालमा भयो ।’ संसद बिघटन परिघटनाले आफूलाई विश्वविद्यालय धाउँदासमेत प्राप्त नहुने ज्ञान दिएको सापकोटाको भनाइ थियो । घुमाउरो ढंगमा संसद बिगघटन गर्नेलाई मुर्खको उपाधि दिँदै उनले थपे, ‘यदि, कसैलाई म मुर्ख छु भन्ने लाग्छ भने उसले ज्ञान लिन थाल्छ र विद्धान बन्छ । तर कसैले म विद्धान भइसकेँ भन्ने सोच्छ भने उसले मुर्खता गर्न थाल्छ ।’

संसद पुनःस्थापनापछि पनि मुलुकको राष्ट्रिय राजनीति पेचिलोकै अवस्थामा रहेको उनको तर्क छ । यही पेचिलो राजनीतिकै कारण सरकारले पूर्णता पाउन तीन महिना लागेको प्रसंग जोड्दै सभामुख सापकोटाले भने, ‘अब भने बिस्तारै राजनीतिक गतिरोधको समस्या हल हुँदै जाने ठानेको छु ।’

साधारणसभालाई सम्बोधन गर्दै सभामुख सापकोटाले सहकारीको माध्यमबाट नागरिकको जीवनस्तर उकास्न मद्दत पुग्ने बताए । ‘भारतको गुजरातमा रहेको एउटा सहकारीले अमूल ब्राण्डबाट आफ्ना उत्पादनहरु बेची लाखौं कृषकको जीवनस्तर उकास्न सघाएको छ’, उनले भने– ‘त्यस्तै प्रकारले सहकारीहरुले उत्पादन, वितरण र रोजगारीलाई जोड्दै अघि बढ्ने हो भने स्थानीयको आर्थिकोपार्जनमा निक्कै टेवा पुग्ने छ ।’ सहकारीको विकासको लागि आफूले सकेको सहयोग गर्ने बताउँदै सापकोटाले किसानको हितमा निरन्तर लागिपर्न सहकारीका सदस्यहरुलाई आग्रह गरे ।

सो साधारणसभामा नेकपा माओपादी केन्द्रका केन्द्रिय सदस्य कृष्णप्रसाद सापकोटा, नेकपा माओवादी केन्द्र जिल्ला समन्वय समितिका संयोजक गोविन्द पराजुली, चौतारा साँगाचोकगढी नगरपालिकाका प्रमुख अमानसिं तामाङ लगायतले सहकारीलाई शुभकामना दिएका थिए । कार्यक्रममा संस्थाका अध्यक्ष प्रेमप्रसाद सापकोटाले वार्षिक प्रतिवेदन प्रस्तुत गरेका थिए । कार्यक्रमकै बीच स्थापनाकालदेखि हालसम्मका सञ्चालक समितिलाई सम्मानसमेत गरिएको थियो ।