सिन्धुका ८ वडामा भएन एमालेको अधिवेशन

चौतारा । सिन्धुपाल्चोकमा नेकपा एमालेले ८ वटा वडामा अधिवेशन गर्न सकेन । विभिन्न समस्याका सो वडामा अधिवेशन हुन नसकेको जिल्ला कमिटिले जनाएको छ ।

जुुगल गाउँपालिका र भोटेकोशी गाउँपालिकामा २/२ वटा र बाह्रविसे नगरपालिका, बलेफी गाउँपालिका, लिसंखुपाखर गाउँपालिका, हेलम्बु गाउँपालिकाका १/१ वडामा अधिवेशन हुन नसकेको हो । ‘केहि स–साना समस्या रहेका कारण ती वडाहरुमा अधिवेशन हुन सकेन’, एमाले जिल्ला अध्यक्ष झम्क नेपालले भने– ‘बाँकी रहेको ८ वडाको अधिवेशन कार्तिक १३ गतेभित्र सम्पन्न गरिसक्छौं ।’

१०३ वटा वडा रहेको सिन्धुपाल्चोकमा ९५ वडामा एकैदिन अधिवेशन सम्पन्न गरिएको छ । चौतारा साँगाचोकगढी नगरपालिका, मेलम्ची नगरपालिका, पाँचपोखरी थाङ्पाल गाउँपालिका, त्रिपुरासुन्दरी गाउँपालिका, इन्द्रावती गाउँपालिका, सुनकोशी गाउँपालिकाका सबै वडामा भने अधिवेशन सम्पन्न भएको छ । विना विवाद सहमतिमा ९५ वडामा नेतृत्व चयन गरिएको एमाले सिन्धुपाल्चोकले जनाएको छ ।