हिमाली क्षेत्र पाँचपोखरीमा ‘ग्रेटर हाफ म्याराथन’ हुने

चौतारा । सिन्धुपाल्चोकको उत्तरपश्चिम क्षेत्र पाँचपोखरीमा ‘ग्रेटर हाफ म्याराथन’ हुने भएको छ ।

धार्मिक तथा पर्यटकीय हिसावले अत्यन्त महत्वपूर्ण मानिएको पाँचपोखरीमा यही कार्तिक २७ म्याराथन प्रतियोगिता आयोजना गर्न लागिएको हो । बिहीबार काठमाडौंमा पत्रकार सम्मेलनमा खेलकुद विकास समिति पाँचपोखरी थाङ्पाल गाउँपालिका अध्यक्ष टासी शेर्पाले अल्टा म्याराथनका लागि उपयुक्त स्थानको रुपमा पाँचपोखरी छनोट भएकाले यस खेलको विकास गर्ने उद्देश्यका साथ प्रदेश खेलकुद विकास परिषद् र पाँचपोखरी थाङ्पाल गाउँपालिका, खेलकुद विकास समितिको साझेदारी तथा नेपाल एथलेटिक्स संघको समन्वयमा पाँचपोखरीदेखि रैथानेश्वर मन्दिरसम्मको २१ कि.मि.को दुरीमा पाँचपोखरी ग्रेटर हाफ म्याराथन २०२१ गर्न लागिएको बताए ।

‘स्वास्थ्यका लागि खेलकुद, राष्ट्रका लागि खेलकुद’ भन्ने मूल नाराका साथ हुन लागेको प्रतियोगिताले साहसिक खेल क्षेत्रमा युवा पुस्तालाई आकर्षित गराउने उद्देह्य राखिएको छ । प्रतियोगितामा विभागीय टोलीहरु नेपाली सेना, सशस्त्र प्रहरी, नेपाल प्रहरी र व्यक्तिगत गरी करिब १५५ जना खेलाडी सहभागी रहने छन् । प्रतियोगितामा पुरुष र महिलाहरुको छुट्टाछट्टै प्रतिष्पर्धा गराइने छ ।

प्रत्येक समूहका प्रथम, दोस्रो, तेस्रो, चौथो र पाँचौ हुने धावकहरुलाई क्रमसः ५०, हजार, ३० हजार, २० हजार, १०, हजार र ५ हजार रुपैंया तथा सिन्धुपाल्चोकबाट सहभागी हुने खेलाडीहरु मध्येबाट प्रथम, दोस्रो र तेस्रो हुने धावकहरुलाई क्रमसः १५ हजार, १० हजार र ५ हजार रुपैंया नगदसहित मेडल र प्रमाणपत्रले पुरस्कृत गरिने छ । त्यस्तै भेट्टान तर्फ प्रथम, दोस्रो र तेस्रो हुने धावकलाई क्रमसः १० हजार, ८ हजार र ५ हजार रुपैंया नगदसहित मेडल र प्रमाणपत्रले पुरस्कृत गरिने आयोजकले जनाएको छ ।

प्रतियोगिताको विषयमा जाकारी दिने उदेश्यले आयोजना गरिएको पत्रकार सम्मेलनमा संविधान सभा सदस्य एवम् एथलेटिक्स सङका केन्द्रिय अध्यक्ष राजिब बिक्रम शाह, बाग्मती प्रदेश खेलकुद विकास परिषद्का सदस्य सचिव सूर्यलाल भण्डारी, पाँचपोखरी थाङ्पाल गाउँपालिकाका अध्यक्ष टासी लामालगायतले प्रतियोगिताका विषयमा प्रष्ट्याएका थिए ।

समुन्द्री सतहदेखि करिब ४ हजार १ सय मिटरको उचाइमा पर्ने पाँचपोखरीमा पाँच वटा पोखरीहरु छन् । यो संसारकै उच्च स्थानमा रहेको पोखरीहरु मध्ये उचाइको हिसावले नवौं स्थानमा पर्ने ठाउँ हो । साहसिक खेलको माध्यमबाट पाँचपोखरीलाई संसारभर चिनाउन सकिने आयोजकले जनाएको छ ।