गैरकानुनी रुपमा सञ्चालित दुई औषधी पसल बन्द !

बाह्रविसे । सिन्धुपाल्चोकको बाह्रबिसे नगरपालिकामा गैरकानुनी रुपमा सञ्चालन गरिएको दुई दुई औषधी पसललाई बन्द गरिएको छ ।

अनुगमन टोलीले बाह्रबिसे नगरपालिका– ४ मा रहेको दीयाना फार्मेशी र बाह्रदेबी हेल्थ क्लिनिकलाई बन्द गरेको हो । ब्यवसाय दर्ता र औषधी बिक्री दुबै अनुमती वेगर सञ्चालनमा आएका कारण यी औषधी पसल बन्द गरिएको प्रमुख जिल्ला अधिकारी बेदनिधी खनालले जानकारी दिए । उनका अनुसार अन्य सामान्य प्रक्रिया नपुगेका आधा दर्जन ब्यवसायीलाई एक साता भित्र समपूर्ण प्रक्रिया पूरा गर्न सतर्क गराईएको छ ।

औषधी ब्यवसायी तथा ‘क्लिनिक’हरुमा चरम वेथिती रहेको गुनासो नागरिकहरुबाट आएपछि जिल्ला प्रशासन कार्यालयको नेतृत्वमा गरिएको अनुगमनमा ब्यवसायीहरुले ब्यवसाय दर्ता तथा औषधी बिक्री अनुमती समेत नलिई सञ्चालन गरेको पाईएको जिल्ला प्रशासन कार्यालयले जनाएको छ ।

‘दर्ता वीना नै ब्यवसाय सञ्चालन गर्ने, अनुमती वीना फार्मेशी सञ्चालन गर्ने, डाक्टरको सिफारि बीना बिक्री गर्न नहुने औषधी बिक्री गर्ने, अर्कै ब्यक्तिको नाममा लाईसेन्स लिने र ब्यवसाय सञ्चालन गर्ने जस्ता समस्या देखियो’, अनुगमन पछि जानकारी दिँदै जनस्वास्थ्य कार्यालय सिन्धुपाल्चोकका प्रमुख दुर्गादत्त चपागाईले भने । उनले जिल्लाका मूख्य बजार क्षेत्रमै सञ्चालनमा रहेका औषधी ब्यवसायीहरुले विना दर्ता औषधी पसल सञ्चालन गरिरहेको पाईएको बताए ।

‘फार्मेशीको अनुमती लिएर पोलिक्नििक सञ्चालन गर्ने र एउटाको लाईसेन्समा अर्कैले औषधी ब्यवसाय सञ्चालन गरिरहेको पाईयो’, उनले भने– ‘यस्ता औषधी पसलहरुलाई हामी कानुनी दायरामा ल्याउने प्रयत्न गरिरहेका छौं ।’