मिलनचोक म्हे–म्हे खेल मैदानको उद्घाटन

नवलपुर । सिन्धुपाल्चोकको इन्द्रावती गाउँपालिका– ८ मा बनेको मिलनचोक म्हे–म्हे खेल मैदानको उद्घाटन गरिएको छ ।

एक कार्यक्रमबीच आईतबार (आज) बागमती प्रदेशका प्रदेश सभा सदस्य युवराज दुलालले खेल मैदानको उद्घाटन गरेका हुन् । आफूले खेलमैदान निर्माण गर्न बजेट विनियोजन गरेको स्मरण गर्दै पूर्व सामाजिक विकास मन्त्री दुलालले आफ्नो योजनाले सार्थकता पाएको बताए । दुलालले सामाजिक विकास मन्त्री हुँदा खेल मैदानका लागि ७० लाख बजेट विनियोजन गरेका थिए ।

खेलकुद क्षेत्रको विकासका लागि भएको यो प्रयास सबैका लागि हौसलाको विषय भएको दुलालले बताए । उनले व्यवसायिक क्षेत्रमा खेल क्षेत्रमा लागेका युवाहरुको लगाव बढ्दै गएको उल्लेख गर्दै अब खेलको माध्यमबाट देशको विकासमा जुट्न युवाहरुलाई आग्रह गरे ।

कार्यक्रममा इन्द्रावती गाउँपालिका अध्यक्ष वंशलाल तामाङ, नेकपा एमालेका जिल्ला अध्यक्ष झम्क नेपाल, कांग्रेस जिल्ला सभापति विकास लामा, नेकपा एकीकृत समाजवादीका नेता ईश्वरी अधिकारी, नेकपा माओवादी केन्द्रका नेता बीरबहादुर तामाङ, ठूलो बाबु श्रेष्ठ, कृष्णगोपाल श्रेष्ठलगायतले सम्बोधन गरेका थिए ।