सिन्धुपाल्चोक मेरो पहिलो प्राथमिकताः सभामुख

काठमाण्डौं । सभामुख अग्निप्रसाद सापकोटाले सिन्धुपाल्चोक सधैं आफ्नो पहिलो प्राथमिकतामा रहेको बताएका छन् ।

नेपाल पत्रकार महासंघ सिन्धु शाखा पदाधिकारीहरुसँगको संक्षिप्त भेटमा सभामुख सापकोटाले जिल्लामा हुने गरेका हरेक कार्यक्रम आफ्ना लागि महत्वपूर्ण रहेको समेत बताए । ठुलाठुला योजना, ठुलाठुला समस्याहरुको सम्बोधनसँगै जिल्लाका सानासाना योजना र समस्याहरुप्रति पनि आफू गम्भीर रहेको प्रतिक्रिया दिँदै जनताका साना साना भनिएको कार्यक्रम पनि आफ्ना लागि सानो नभएको खुलस्त पारे । वर्षिनौ प्राकृतिक विपत्तिको सामना सिन्धुपाल्चोक पर्दै आएका कारण पनि जिल्लालाई आफूले प्राथमिकता दिने गरेको उनले बताए ।

पछिल्लो पटक जनभेटघाटलाई तीब्र बनाउदै गरेका सभामुख सापकोटाले जनतासँगको भेटघाटलाई सानोठूलो कार्यक्रम भनेर छुट्याउनु नहुने तर्क गरे । जनताकोमा जानु, जनताको कार्यक्रममा जानु जनप्रतिनिधिको कर्तब्य भएको र यस्तै कार्यक्रममार्फत जनताको वास्तविक पिरमर्का र समस्या बुझ्ने मात्र नभै समस्या समाधान गर्ने अवसरको रुपमा यस्ता कार्यक्रमलाई लिने गरेको पनि सभामुख सापकोटाले बताए ।

१५ दिनभित्र नाकामा सहजता आउने दावी गर्दै सभामुख सापकोटाले भने चिनियाँ पक्षसँग विभिन्न स्तरमा भएको संवादको सकारात्मक परिणाम आउन लागेकोमा खुशी व्यक्त गरे । अबको १५ दिनमा चीनबाट नेपाल भित्रिने मालबाहक गाडीको संख्यामा बृद्धि हुने सभामुख सापकोटाले विश्वास लिए ।

बाह्रबिसेलाई ट्रान्जिट सिटिको रुपमा विकास गर्ने आफ्नो सपना रहेको र सो पूरा गरेरै छाड्ने उनले प्रतिबद्धता जाहेर गरे । भेटमा सिन्धुपाल्चोकको समग्र विकास निर्माणका कार्य, जिर्ण अरनिको राजमार्ग मर्मत, तातोपानी नाका, मेलम्ची बाढिपहिरो पछिको पुननिर्माण र पत्रकारिताको विद्यमान अवस्था बारे महासंघका अध्यक्ष जीवन श्रेष्ठ र उपाध्यक्ष दिनेश थापाले सभामुख सापकोटाको ध्यानाकर्षण गराएका थिए ।

सिन्धुपाल्चोकको पत्रकारिता क्षेत्रमा पत्रकार महासघले खेलेको भूमिकाको उच्च प्रशंसा गर्दे आगामी दिनमा पनि महासघसँग सहकार्य गरेर आफू अघि बढ्ने प्रतिबद्धता पनि सभामुख सापकोटा व्यक्त गरे । सवारी साधन अभावले पत्रकारले झेल्नु परेको दुःखको महसुस गर्दै आगामी दिनमा पत्रकार महासंघलाई सवारी साधन उपलब्ध गराउने प्रतिबद्धता जाहेर गर्दै सभामुख सापकोटाले भने– ‘जिल्लाका पत्रकारका लागि सवारी साधनको आवश्यकताको महसुस मैले पनि गरेको छु । त्यसका लागि अधिकतम प्रयास हुने छ ।’