एमाले विभाजन भएको छैनः सचिव विष्ट

मेलम्ची । नेकपा एमालेका केन्द्रीय सचिव गोकर्ण विष्टले एमाले विभाजन नभएको भन्दै केही नेताहरु चोइटिएर गएको बताएका छन् ।

सोमबार नेकपा एमाले मेलम्ची नगर कमिटीको पहिलो अधिवेशन उद्घाटन कार्यक्रमलाई सम्बोधन गर्दै विष्टले एमाले जनताको पार्टी भएको दाबी गरे । ‘एमालेलाई कमजोर पार्न प्रचण्डले ठूलो चलखेल गरे’, सचिव विष्टले भने– ‘तर सफल हुन सकेनन्, यो एमालेको मजबुदीको कारण हो ।’ एमाले सिध्याउन धेरै प्रयत्न गरेका प्रचण्ड नेपाली राजनीतिको कलंक भएको उनले आरोप लगाए ।

अहिले पनि माओवादीले कांग्रेससँग गठबन्धन गरिरहेको भन्दै प्रचण्डकै कारण कांग्रेसको रुखको पात सबै झर्ने निश्चित भएको विष्टको दाबी छ । पार्टीमा केही असमझदारी आउँदैमा पार्टी फुटाउने काममा माधव नेपाल लागेको भन्दै माधव नेपालको पार्टीको कुनै सिद्धान्त, विचार र दृष्टिकोण नभएको पार्टीको संज्ञा दिए ।

कार्यक्रममा पार्टीका केन्द्रीय कार्यालय सचिव एवम् केन्द्रीय सदस्य शेरबहादुर तामाङले एमालेलाई कुनै गुटको राजनीति गर्न नसुहाउने बताए । उनले गुटको राजनीति गर्ने र अरुको घोडा चडेर हिँड्नेहरु निस्किएर गएको उल्लेख गर्दै अब एकताबद्ध, निश्चल एमाले मात्रै रहेको बताए । प्रचण्डको इसारामा माधव नेपालले पार्टी फुटाएको बताउँदै तामाङले प्रचण्ड राजनीतिको ऐंजेरु भएको बताए ।

कार्यक्रममा केन्द्रीय सदस्य दावा तामाङले जनताको सुख, दुःखको पार्टी भनेकै नेकपा एमाले भएकाले अन्योलमा बसेका साथीहरुलाई ढुक्क भएर एमालेमा आउन आग्रह गरे । उनले नगर अधिवेशनले सही नेतृत्व चुन्नेमा आफू ढुक्क रहेको समेत बताए ।

कार्यक्रममा पार्टीका नेताहरु सुभास कर्माचार्य, जिल्ला अध्यक्ष झम्क नेपाल, उपाध्यक्ष डोल्मा तामाङ, बागमती प्रदेश कमिटी सदस्य बालकृष्ण देउजा, कृष्णगोपाल तामाङ, विजयकृष्ण श्रेष्ठ लगायतले सम्बोधन गरेका थिए । अधिवेशनले नयाँ नेतृत्व चयन गर्ने छ । नगर कमिटी अध्यक्षमा उपेन्द्र तामाङ र विजयकृष्ण श्रेष्ठले दावी गरेका छन् । नगर कमिटी अध्यक्ष डम्बर अर्यालको अध्यक्षतामा भएको उद्घाटन सत्र सकिएलगत्तै साँझबाट बन्दसत्र सुरु हुने जनाईएको छ ।