सिन्धुपाल्चोकमा ‘सफ्ट लकडाउन’ सुरु

चौतारा । कोभिङ– १९ माहामारीको संक्रमण बढ्न थालेपछि सिन्धुपाल्चोकमा जिल्लामा कार्तिक ३० गते सम्मका ‘सफ्ट लकडाउन’ गरिएको छ ।

जिल्लामा कोरोना संक्रमितको संख्या ९ पुगेको भन्दै जिल्ला प्रशासन कार्यालयले कार्तिक १५ गते राती १२ बजे देखि कार्तिक ३० गते राती १२ बजेसम्म समयसीमा तोकी ‘सफ्ट लकडाउन’ गरेको हो । ‘संक्रमणको रोकथाम र नियन्त्रणका लागि नेपाल सरकार, मन्त्रीपरिषद्को निर्णय अनुसार संक्रामक रोग ऐन २०२० को दफा २ र स्थानीय प्रशासन ऐन, २०२८ को दफा ६ को उपदफा ३ ले दिएको अधिकार प्रयोग गरी ‘सफ्ट लकडाउन’ गर्ने निर्णय गरिएको छ’, जिल्ला प्रशासन कार्यलयबाट जारी आदेशमा भनिएको छ ।

लकडाउन अवधिभर अनावश्यक रुपमा मानिसहरु जम्मा हुने, भिडभाड गर्ने, सभा जुलुश गर्ने, जात्रा महोत्सब, भोज आदि नगर्न, तिहार, छठ आदि, स्वास्थ्य प्रोटोकलको पूर्ण पालना गरी न्यूनतम सहभागितामा परिवार भित्र मात्रै मनाउन, देउसी, भैलो, नाटक, नाचगान नगर्न आदेशमा भनिएको छ ।

त्यस्तै होटल व्यवसायहरुमा पूर्णरुपमा स्वास्थ्य सुरक्षाको मापदण्ड पालना गरेर मात्र सञ्चालन गर्न, सर्वसाधारण व्यक्ति, समूह तथा संस्था लगायतका निकायहरुबाट आर्थिक, सामाजिक तथा व्यवसायिक गतिबिधिहरु सञ्चालन गर्दा नेपाल सरकारले तोकेको स्वास्थ्य मापदण्ड पूर्ण रुपमा पालना गरेर मात्र गर्न, स्थानीय तहहरुले आ–आफ्नो क्षेत्र भित्र कोभिड– १९ संक्रमण जोखिमको अवस्था मूल्याङ्कन गरी निषेधाज्ञा थप भएमा सो को लागि जिल्ला कोभिड– १९ व्यवस्थापन समितिमा स्मार्ट लकडाउन कार्यबिधि २०७८ बमोजिम सिफारिस गर्न समेत प्रशासन कार्यलयले भनेको छ ।