कम्युनिष्टले देशलाई अस्थिर बनाएः राणा

चौतारा । राष्ट्रिय प्रजातन्त्र पार्टीका केन्द्रीय अध्यक्ष पशुपती शम्शेर राणाले कम्युनिष्टहरुले देशलाई अस्थिर बनाएको आरोप लगाएका छन् ।

सिन्धुपाल्चोकको चौतारामा राष्ट्रिय प्रजातन्त्र पार्टीको जिल्ला अधिवेशनको उद्घाटन सत्रलाई सम्बोधन गर्दै राणाले एमाले–माओवादीको गठबन्धनले मुलुकलाई स्थीर निकास दिने आशाले जनताले बहुमत दिएपनि यसले जनतालाई आशाभन्दा निराशा मात्रै दिएको बताए । ‘अब तीन टुक्रा भएको कम्युनिष्ट र घिस्रिएर काँग्रेस हिडिरहेकाले यसको फाईदा राप्रपाले छोप्न सक्नुपर्छ’, राणाले भने– ‘देउवा सरकारबाट पनि जनताले आश गर्ने ठाउँ छैन, त्यसको विकल्प राप्रपा बनाउन तपाईहरु सबै जुट्नुपर्छ ।’ अब जनताको घरदैलोमा गएर स्थानीय तहको निर्वाचनको तयारी गर्न कार्यकर्ताहरुलाई राणाले आग्रह समेत गरे ।

राणाले आफुले २०२० सालतिरबाट सिन्धुपाल्चोकमा राजनीति सुरुवात गरेको स्मरण गर्दै छ दशक राजनितिक जीवनमा सिन्धुपाल्चोकको विकासले काँचुली फेरेको समेत बताए । आफ्नो राजनितिक जीवनमा विकासको लहर आएको र यो यात्राले लामो समयसम्म निरन्तरता पाएको समेत राणाले दाबी गरे ।

राष्ट्रिय प्रजातन्त्र पार्टीका जिल्ला अध्यक्ष नरसिंह श्रेष्ठ (गोपाल) को सभापतित्वमा भएको कार्यक्रममा कार्यसम्पादन समितिका केन्द्रीय सदस्य केदार धमला, केन्द्रीय सदस्यहरु रमेशकुमार लामा, पुष्कर ढुँगेल, उदय सापकोटा, दईन्द्रबहादुर ठकुरी, यस्मीन ढुँगाना, सिन्धुपाल्चोक २ नम्बर क्षेत्र प्रदेश (क) का अध्यक्ष तथा केन्द्रीय सदस्य बाबुराम खड्का, केन्द्रीय सदस्य निर्मला श्रेष्ठ लगायतको सहभागिता रहेको थियो ।